Resientemente Curaçao Development Institute N.V. (CDI) huntu ku Kamara di Komersio (KvK) a organisá e kurso “Konosementu Finansiero Básiko”.
Tantu KvK komo CDI ta haña ku formashon finansiero ta importante pa empresario chikí i futuro empresario. “Nos ta pasando den temporada difísil ku hopi desempleo, hopi ta opta pa hasi di nan talento un negoshi, i biba for di dje. Pero sin e konosementu básiko di e aspektonan finansiero hopi ta frakasá”, Nevita Mezas kordinadó di e programa Konosementu Finansiero pa CDI a bisa.
CDI ta un instituto gubernamental di desaroyo moderno, ku entre otro tin e meta pa kapasitá i desaroyá e sektor di negoshi na Kòrsou kual lo resultá den mas kupo di trabou, i preferibelmente tambe eksportashon di nos produkto i servisio o baha dependensia riba importashon. Kapasitashon di empresario lokal en general tambe ta hopi importante pa por logra remplasá importashon ku nos produkto i servisio i subsekuentemente yega na produkto i servisio kual tin kalidat haltu pa por eksportá. Esaki lo kontribuí na nos balansa di pago positivamente.
E kurso “Konosementu Finansiero Básiko” ta un kurso di tres dia tokante di aspektonan ku un empresario mester tene kuenta kuné pa evitá problemanan finansiero den su kompania. Partisipantenan tabata satisfecho ku e kurso. Den nan remarke final algun a bisa ku e kurso a duna nan un bista den finansa di nan kompania miéntras ku otronan a bisa ku den e kurso nan a mira kon nan por atendé finansa di nan kompania sin hinka nan mes den debe ku no ta nesesario. Tambe e partisipantenan a indiká ku impuesto ta e otro tema ku nan ta interesá den dje. Nan ta interesá di siña kon tin ku yena papelnan di impuesto i kon nan tin ku atendé ku impuesto en general komo empresario. Esakinan ta tópikonan di kursonan ku tambe KvK ta ofresé riba base kontinuo, den seshonnan spesífiko.
E kurso “Konosementu Finansiero Básiko” tabata posíbel ku finansiamentu di COSME (fondo di Union Oropeo). Despues di e promé seshon eksitoso na kual 20 empresario i futuro empresario a partisipá, CDI i KvK, lo kontinuá ku e programa di “Konosementu Finansiero” pa empresario. Próksimamente lo kuminsá ku e kursonan mas avansá tokante temanan di entre otro atministrashon i kalkulashon di kosto. E siguiente kurso básiko lo tuma lugá dia 26, 27, i 28 di Mart den sala di instrukshon na KvK na Pietermaai. Pa esnan ku ke sigui amplia nan konosementu den empresaria ku un paso mas amplio, CDI ta presentá den koperashon ku su partnernan Business Boost Start-up, kual programa tin un durashon di 10 módulo total. E módulonan ta wòrdu presentá ku uzo di un sistema online di simulator ” Business Brainer” via e kompania lokal Excellency B.V.
Pa mas informashon, inskribí i keda na altura di e programa di kapasitashon “Konosementu Finansiero” por bishitá e página di facebook “ Business Boost Curaçao i di “Empresa chikí” òf por mail na [email protected].
