Chris Kross a saca un cancion nobo cu yama Andicuri, treciendo asina un ode of manifestacion na un oraculo di amor. E cancion aki ya ta figura tanto riba Youtube como riba 24ora.com. Ta un composicion propio di KrossHart esta di Chris Kross mes y Sigfried Hart. E proceso eigenlijk ta cu Kross a composita e musica y Hart, hunto cu tata di Kross, a bin cu e letranan. Asina a realisa Andicuri.
E storia tras di e cancion ta cu un persona ta bay Andicuri y e oraculo ta conta e persona ken t’esun. E ta cont’e tur e secretonan cu e persona kier sa. Un mito, segun Kross.
E oraculo ta bisa e persona pa e wak su mes. Door di e awa na Andicuri, e persona ta wak su mes. “E persona cu bo mester stima t’abo mes,” Kross ta splica. E tin un mensahe un tiki profundo.
Tin un baile tambe den e videoclip. Segun Kross e baile ta idea di Sigfried Hart, cu e pensamento pa combina otro tipo di baile.
E bailarina Mafe a traha su propio coreografia a base di e cantica, manda basta tempo pa e por studi’e, pa e por bin cu un inspiracion. Izaline Calister ta canta e cancion, segun Chris Kross.
Kross a comenta creciendo, tabata fanatico masha grandi di Izaline Calister, scuchando su musica. E conexion tabata cu den pasado Kross a yega di toca cu Izaline y a produci un cancion cu Miguel Genser cu e cancion ‘Baila cu mi’, cu Izaline a participa aden caba.
Chris Kross a sigui splica cu asina ey a yega na e contacto pa logra haya Izaline riba e cancion.
E cancion aki tabata parti di un album yama ‘Alegriastraat’ cu cancionnan di propio composicion. Por a scoge for di aki cua cancion cu Izaline por a canta. Den tur e canticanan cu tabatin, Andicuri a resona mas den su estilo y bos. Esey eigenlijk tabata e escogencia, cu Andicuri ta fit perfecto cu Izaline.
Izaline mes, segun Kross, tabata hopi contento. El a gusta e cancion hopi na prome instante, mirando cu e tabata un demo. Na e momento ey caba, Izaline a gusta e areglo, e letranan y e cancion riba su mes.
Sigur esaki ta un honor pa tin Izaline den e proyecto aki. Kross a conta cu tin hopi respet pa Izaline. Pa hopi tempo caba ta scuchando su musica. Tabata un honor cu e cantante aki acepta e invitacion pa canta cu KrossHart.
KrossHart tin mas proyecto den tapara, entre otro un album instrumental, y un album vocal cu colaboracion di entre otro Mitchel Tromp.
