Mayornan di Imani van Wilgen a hasi petishon via Korte Komun di Kòrsou pa duna nan yu, ku a fayesé na nasementu su nòmber di forma ofishal. E kaso aki lo tuma lugá djaweps, 6 di febrüari 2020, pa 10.15 a.m.
Un aña pasa Farièle i Dominic van Wilgen a kuminsá e kaminda difísil pa duna nan yu ku a nase sin bida un nòmber. Durante e proseso aki e mayornan di Imani, a kana diferente trayekto. Entre otro a hasi un petishon por medio di parlamentario Ana Maria Pauletta pa kambia e lei di registrashon.
Tambe nan a hiba kombersashon ku diferente otro mayor ku ta pasando den e mesun situashon. Mayornan di Imani ta konsiente ku na diferente pais di mundu e derecho innato pa nòmber ya ta regla, den esaki Hulanda a regla e registrashon di baby nan ku fayesé na nasementu den diferente lei. Den luna di sèptèmber 2019 mayornan di Imani a entregá un petishon na Korte Komun pa kambia e nòmber riba e akta di fayesementu di nan yu. Awor aki e akta ta indiká ku e baby no tin nòmber. E echo ku no tin un nòmber riba e akta di fayesementu ta kousa un doló inmenso na e mayornan.
Otro konsekuensia di esaki ta ku e mayornan no tin ningun dokumento ofishal riba kual ta duna akta ku e baby ku a fayesé tin un nòmber. Mayornan di Imani ta spera ku e kaso aki ta sirbi pa habri un porta pa tur mayor ku kier duna nan yu resien nasí ku a fayesé un nòmber ofishal. I ta pidi tur mayor ku a pasa den e mesun situashon òf personanan ku ta simpatisá ku e kousa pa sostené e kaso aki i bini djaweps próksimo na Korte Komun pa duna aporte.
