Kiwanis Club of Aruba ta sostene fundacion siñami paso pa paso Aruba

Recientemente e miembronan di Kiwanis Club of Aruba a haci un bishita na Fundacion Siñami Paso pa Paso Aruba.

Durante e bishita na e fundacion e miembronan presente a haya un recorido y a ricibi informacion extenso di e diferente proyecto- y servicionan cu e fundacion ta haci na beneficio di e comunidad di Aruba. Kiwanis Club of Aruba kier duna su aporte tambe, pa asina yuda Fundacion Siñami Paso pa Paso Aruba continua cu su tremendo trabou.

Presidente di Kiwanis Club of Aruba, Edalitza Weller, a gradici y elogia Fundacion Siñami Paso Pa Paso Aruba, pa nan aporte brinda na e comunidad di Aruba. Linda Lou Huiskes ‘Chair” di “Donations committee”, Carol Kelly miembro di “Donations Committe” hunto cu e Presidente di Kiwanis Club of Aruba, Edalitza Weller, a haci entrega di e donacion balora na Awg. 2,000.00 na e tesorero y representante di e fundacion, Sr. Carlos Falla. E donacion lo sirbi como un contribucion importante na e proyecto di “Telerehabilitation” pa asina adkiri material necesario pa ehecucion di e proyecto. E meta di e proyecto aki ta pa yuda e muchanan cu tin autismo, sindrome di down, dyslexia, adultonan cu ta sufri di e enfermedad di demencia y parkinson, beneficia di un e programa innovativo cu lo yuda nan mehora nan mobilidad motorico y vocalubario.

“E proyecto aki lo yuda pa sigui duna un bon servicio na e clientenan y tambe lo beneficia e clientenan di otro instancia y organisacion cu ta haci uzo di nos servicio”. Sr. Carlos Falla a gradici Kiwanis Club of Aruba pa e tremendo sosten y confiansa.
Kiwanis ta un organisacion global di boluntario dedica na mehora mundo via un mucha y via di un comunidad cada biaha y tin como lema: sirbiendo e muchanan di mundo. Kiwanis Club of Aruba ta activo den e comunidad Arubano desde 1965. Pa mas informacion di Kiwanis Club of Aruba y of su actividadnan por acudi na www.kiwanisclubofaruba.org of Facebook page Kiwanis Club of Aruba.