Cu Minister Glenbert Croes no gusta e forma di traha di e director di DIMAS, mr. Kathy Ruiz-Paskel, no ta un secreto mas. No ta prome ni di dos, sino di tres biaha cu ta mand’e cas of strob’e di eherce su funcion como director. E minister ta prefera pa e mes tuma decision ken ta haya permiso of no, pero pa Ruiz-Paskel ehecuta. Den bida real e formula aki no ta funciona y mas bien ta tum’e como un sorto di persecucion politico.
Ta subraya e echo cu ta core cu Paskel “sin motibo” pasobra tabata dia 3 di mei ultimo, cu durante su vakantie, Minister di Labor y Integracion, Glenbert Croes, a prohibie entrada na tur edificio di DIMAS pa motibo di un investigacion. Minister a presenta un lista largo di motibo pa cual ta duda den su integridad y capacidad pa maneha e departamento. A inform’e cu e investigacion ta dura un maximo di tres luna, durante cual periodo e mester keda cas y abstene di mete den cualkier decision of asunto di trabou.
DRH: Nos no tin nada contra Bo!
Dia 1 di augustus ultimo, Departamento di Recurso Humano (DRH) a informa Kathy Ruiz-Paskel cu for di e investigacion interno no a logra topa ningun iregularidad. Den nan mesun palabra nan a bisa cu e investigacion disciplinario ta afgerond door di DRH y cu a constata cu no tabatin plichtsverzuim y tambe DRH a inform’e cu no tin motibo pa un trayecto pa oplegging di un straf disciplinario. Pues a bis’e cu tur e show cu nos a “monta” contra bo tabata pornada, sin base, pa purba mancha bo nomber y imagen, pero cu nos no a topa nada pues bo por bin traha bek ‘manera cu nad’un pasa’.
Bo a “gana” pero bo a “perde”
E alegria den cas di famia Ruiz-Paskel na Noord no a dura largo. De facto, el a dura un dia so! Pasobra un dia despues, esta dia 2 di augustus 2023 a present’e un decreto ministerial. Minister a inform’e cu e ta oblig’e pa temporalmente bay traha otro caminda. A manda e director di DIMAS un decreto gubernamental (Ministerieele Beschikking) den cual e mandatario ta orden’e pa e asumi un cargo temporal, durante seis luna largo, como
wetgevingsjurist entrante dia 3 di augustus 2023 na Directie Wetgeving en Juridische Zaken (DWJZ). Ey e lo no ta director, sino un otro hurista mas, resortando bou di e director di e departamento.
Abogado David Kock ta preparando
Obviamente e director di DIMAS no tin pensa di acepta esey sin mas. E no ta haya husto cu sin ningun motibo valido, cu un mandatario por yega y kit’e di su funcion. E asunto ta den man di abogado mr. David Kock, cu atrobe lo prepara un caso sumario pa hues suspende of destrui e decreto gubernamental di Minister Glenbert Croes.
Croes kier pa Paskel bay otro departamento
E discucion ta cu Minister Glenbert Croes ta prefera pa Kathy Ruiz-Paskel acepta un otro funcion. Pero, ora cu a pidie pa presenta un oferta, el a ofrece funcionnan cu no ta di director of cu no ta ni existi! Pues, mas bien e kier pa Paskel acepta “ki cu ta” basta e bay di e funcion pa e por haya e mandato completo den DIMAS riba ken ta haya permiso of ken no ta haya permiso di estadia of combinacion di estadia y trabou.
Aña pasa ainda a perde caso
Tabata dia 30 di mei 2022 cu hues den Corte di Empleado Publico a tuma un decision pa suspende algun decision di Minister Glenbert Croes pa cu un maneho nobo cu e kier implementa na Departamento di Integracion, Maneho y Admision di Stranhero (DIMAS). E decision cu e mandatario a tuma pa pone e director un banda y hinca operacion di e departamento aki den man di un subordinado, ta contra ley. Hues a bisa cu e caso aki lo no tin caminda pa cana den un bodemprocedure tampoco, mirando e violacion di ley. Hues a suspende e decision di Minister Glenbert Croes pa hala Paskel un banda pa pone un Management Team. Cu e decision di hues, Kathy Paskel a haya su funcion bek y cu tur su poder pa firma y tuma decision!
Comision pa reorganisa DIMAS
Hunto cu Liri Frias tin tambe Elizabeth Pope, cu tabata traha na Inmigracion na Aeropuerto. Un otro persona cu ta den e comision ta Jennifer Tromp, ex-coordinador di Minister Andin Bikker y cu awe a bay pa Glenbert Croes. E tin hopi conocimento den finanzas, pero no den maneho di stranheria. Nan tres lo mester presenta un conseho na minister Glenbert Croes con miho pa reorganisa DIMAS.
Minister a tuma su poder bek
Pa ley, ta e Minister di Integracion tin e poder pa otorga permiso di trabou y di estadia na Aruba. T’e a “mandateer” e poder ey na director di DIMAS y DAO. Pero, na su discrecion, e por tuma e poder ey bek. E pregunta ta si e tin tempo pa atende mas o menos 15 mil peticion pa aña. Cu si e trabou ey no lo stroba su otro ocupacionnan como minister.
Posicion di conflicto
Den pasado semper e funcion di Minister di Labor tabata den man di un otro persona cu esun di Integracion. Esey ta precisamente pa evita conflicto, o sea cu e mesun cu ta duna permiso di labor ta esun cu ta duna permiso di estadia. Di e forma ey esun por a controla e otro. Awo cu Glenbert Croes a nombra “un hende di dje” den funcion di director di DAO, el a logra domina e procedura eyden, banda di otro coordinadornan y personanan yega na famia cu ta rondona e director di DAO. Pero den DIMAS e nunca a logra domina pasobra e maneho eyden semper a keda “waterdicht” y pa wanta influencia politico afo.
Monique van Wilgen temporalmente na cabes
Relaciona cu e decision pa suspende Kathy Ruiz-Paskel for di e funcion di director di DIMAS na luna di mei ultimo, a anuncia cu temporalmente a departamento cu ta procesa permiso di estadia y di trabou ta keda bou guia di mr. Monique van Wilgen. E tabatin e funcion di director interino caba. Pero, adicionalmente a dicidi pa toch impone un “Management Team” na DIMAS, consistiendo di Monique van Wilgen, Mario Wever y Sergio de Cuba. E ultimo aki tabata coordinador (na disposicion) di ex-Minister Alex Schwengle di AVP.
Monique van Wilgen di 55 aña di edad a studia ley na Rijks Universiteit na Leiden, na Hulanda. E ta un bon conocedo di e leynan di stranheria y di labor. E tin algun aña caba den servicio di Gobierno di Aruba y conoce e maneho den DIMAS bon caba.
Tocante DIMAS
DIMAS, Departamento di Integracion, Maneho y Admision di Stranhero ta operacional desde 1 di juli 2006 y ta situa na Paardenbaaistraat 11 (ex edificio di Ontvanger), na Oranjestad. DIMAS ta encarga primordialmente pa procesa peticionnan pa un permiso di estadia y residencia temporario of definitivo na Aruba (sea cu ta pa traha of no). Tambe DIMAS ta procesa peticionnan pa declaraciondi constancia cu no ta rekeri di permiso of constancia cu tin admision segun ley y peticionnan pa carta di re entrada.
Anualmente DIMAS ta atende mas o menos 15 mil peticion, entre 125 pa 180 cita pa dia. Den 2017, DIMAS a atende un total di 14135 peticion. E nacionalidadnan cu ta domina, mescos cu añanan anterior, ta Colombiano como prome, Venezolano como di dos, Dominicano, Hulandes, sigui pa Haitiano. Verblijfsdoelen cu a resalta den aña 2017 ta e permiso pa traha, arbeid in loon dienst; sigui pa esun di di famia (gezinshereniging of
gezinsvorming). E parti di personal domestico tambe ta un di nan cu a domina y esunnan cu tin un laso special cu Aruba, sea cu nan tin yiu na Aruba, of tin un status cu nan tabata casa cu un Arubiano y a keda mantene un permiso. Den edad, mas cu 50% ta riba edad di 35 aña y e porcentahe ta parti na mas of menos 56% hende muhe y 44% hende homber.
E orario di oficina di DIMAS ta di dialuna pa diabierna di 7:30am pa 12:00 pm y di 1:00 pm pa 4:30 pm. DIMAS su callcenter 5221500 ta alcansabel durante orario di oficina. Tambe por dirigi un email pa DIMAS (24/7) na [email protected] of via Facebook/messenger: Departamento di Integracion, Maneho y Admision di Stranhero. Pa keda na altura di (cambionan den) procedura, proceso, maneho, download formulario y lista di rekisitonan y tambe pa traha bo cita online pa e diferente servicio y producto, bishita nan website www.dimasaruba.com.
