Djabièrne 13 di sèptèmber 2019 alrededor di 18.08’or, Sentral di Polis a dirigí un unidat pa poliklínika di St. Elisabeth Hospital, pa un hòmber ku a yega einan ku un hinká. Na e sitio, polis a bin topa ku un dama, ku a deklará ku un ratu promé, e ku su partner a keda agredí pa un otro hòmber den un restorant asiatiko bou di viadukto na Otrabanda.
Tabata trata di un diskushon entre e víktima i e agresor. Durante di e diskushon aki, e agresor a kue un bòter di serbes kibrá i hinka e víktima kuné na altura di su pechu robes. Ku yudansa di e partner i personanan den besindario a hiba e víktima poli, na unda el a risibí tratamentu médiko. E sospechoso ta konosí i polis ta buskand’e. Investigashon den e kaso aki ta kontinuá.
