Diasabra awo lo tuma luga e certamen di Miss Universo 2023, cu e participacion di 86 candidata. E certamen lo tuma luga na San Salvador, El Salvador.
Aruba su representante ta den man di Karol Croes, cu sigur ta halando masha atencion na El Salvador, cu a combersa cu nos director, Mark Benson Denz.
Karol a indica cu e ta sumamente agradecido p’e apoyo, ya cu diamars mainta e tabatin un di e momentonan mas importante di henter e certamen, cual ta e entrevista cu hurado.
El a bisa cu e entrevista a bay sumamente bon. “Fantastico, “ manera el a bisa. El a conta cu esaki ta e momento cu bo mester por domina bo nervionan, p’asina contesta di curason, demostra bon energia pero tambe “e bunita personalidad cu bo tin.”
Pa loke ta su expectativa pa cu e certamen y su experiencia na e certamen, Karol, hopi sigur di su mes a bisa cu e experiencia tabata totalmente loke el a spera. Si ta bin algun cosnan nobo y semper e miedo ta keda pa algo nobo cu bo no sa kico por spera.
Pero e ta hopi contento cu el a haya un ‘roommate’ cu ta hopi respetuoso, nan tin bon comunicacion cu otro. Tin regla den camber, cual no ta genera problema na ora di prepara pa un actividad.
Tambe e ta contento cu e tabata por tin e oportunidad di siña conoce e pais un poco mas. Como un persona cu ta gusta naturalesa, e ta contento di por a bishita e volcan Boceron. Pero tambe cu e tabata por a siña conoce un poco mas di e cultura di e otro paisnan, di nan cultura y custumbernan.
Karol a sigui bisa cu e ta bay bon cu e otro candidatanan. “Semper bo ta tende di rivalidad durante e certamen, pero durante e certamen aki e por bisa cu tur siguridad cu e bond cu e candidatanan a crea cu otro, tabata algo hopi bunita. Di wak con un ta yuda otro, di tur manera.”
REGLA
Tambe Karol a bisa cu nan tin un cuerpo di siguridad cu ta tur caminda cu nan. E candidatanan no mag di topa cu niun hende cu no ta forma parti di e organisacion. Ademas nan tin un supervisor, na cual nan mester duna cuenta di tur loke nan ta haci. Sigur, Karol a bisa di ta hopi contento cu e supervisor, no tin nada di keha. Nan ta bay super bon cu otro.
El a bisa di ta gradici Dios na tur momento, pa pone e hendenan cardinal den su caminda, cu ta apoy’e tur momento.
PASARELA
Diaranson lo tuma luga e anochi preliminar, unda e candidatanan lo haci e pasarela den badpak y tambe den e trahe di gala. E anochi aki e huradonan ta duna e candidatanan un puntacion a basa di e con nan ta riba pasarela den e dos categorianan aki.
Basa riba esaki, nan ta sa ken ta mas o menos ken ta e top 20 pa asina e anochi final, ta wak ken a logra den top 20 y e top 10 y top 5. Pro bisa cu e anochi preliminar ta esun mas importante di e certamen.
TRAHE NACIONAL
E tema di trahe nacional ta relaciona cu e proteccion di naturalesa, cu ta algo cu ta hopi na su curason.
UNION
Por ultimo, Karol a bisa di ta hopi contento di por carga e nomber di Aruba na grandi. E ta haciendo tur lo posibel pa bin cas cu e corona. E lo ta un simbolo di motivacion pa e hobennan, cu maske cu nos ta bin di un isla chikito, ta posibel pa alcansa nos soñonan y haci nan un realidad. Union ta haci forsa!
E cobertura di Miss Universe for di San Salvador ta wordo presenta exclusivamente pa Dufry cu un tremendo sale na su tienda den Caya Principal y su RED App unda bo por spar y usa punto. Tambe Setar NV awor cu Data y yamada den un solo plan, Hybrid cuminsando for di Afl.55 cu 15GB di Data.
E cobertura di Miss Universe for di San Salvador ta wordo presenta exclusivamente pa Dufry Duty Free cu un tremendo specials na su tienda den Caya Principal riba perfume y su RED App unda bo por spar y usa punto. Tambe SETAR NV : Bo kier Double data? Busca bo Prepaid data bundle di 3 dia pa Afl.15 y ricbi double data riba diabierna!
