Diahuebs anochi miles di persona tanto di Corsou pero tambe for di region, Merca y Europa a sa di presencia e prome anochi di Curacao North Sea Jazz Festival. Apesar cu e organisacion a encontra algun obstaculo cu logistica di transporte, e anochi tabata uno sublime.
Juan Luis Guerra y su 440 a habri e festival cu un variedad di musica clasico como nobo. E artista nunca ta desapunta su publico y hunto cu su banda el a sa di pone henter e publico baila for di comienso te final.
Despues di un pausa cortico, e festival a continua cu un otro presentacion. Ta trata aki di Aymee Nuviola di Cuba. Aymee hunto cu su orkesta a sa di conkista e curasonnan di esnan cu no a yega di tende di dje cu su musica contagioso. Un gran cantidad di Salsa, Cha Cha y otro ritmonan a sa di zona durante su presentacion. Hopi ta e comentarionan cu ta trata aki di e Celia Cruz di awe.
E anochi a cera cu presentacion di Havana D’Primera. Su lider di banda ta un trompetista hopi reconoci den e mundo farandulero y hunto cu su amigo musiconan na a duna un bunita presentacion pa e amantenan di bon musica.
Tur cos ta cla pa e di dos anochi cu presentacionnan di e.o Pitbull, Black Eyed Peas, Kenny G, Earth Wind & Fire y mas.
Pa loke ta e parti di logistica e organisacion a duna e siguiente declaracion:
Lamentablemente previo na e concierto di apertura di Juan Luis Guerra a surgi un situacion den cua e “shuttle” busnan a keda pega den trafico entre e luganan di parkeer y WTC.
Aunke cu e reparticion di busnan ta igual cu añanan anterior, tog un parti grandi di e publico mester a warda mucho largo pa transporte pa WTC, loke nos ta lamenta profundamente. Nos lo sigura cu e transporte pa dianan cu ta sigui lo ta optimal y lo ta igual cu añanan anterior.
