Jose Dania: Un icono di Dakota cu a bira un icona di Aruba

Un bela di inspiracion, calor y stimacion cu a ilumina alma y curason mas di un siglo na Dakota y di Aruba henter te na su final: e bida largo y bunita di Jose Maria Dania. Te den su ultimo rayonan ainda tabata pone e claridad bao di cual famia y amistad tabata bini hunto den fe y amor.  

Jose Maria Dania, Papa Dania, “Pai” tabata onderofficier den “Vrijwilligers Korps Aruba (VKA)”. Den comunidad di Aruba conoci como soldat di Schutterij den tempo di guera. Fiel tabata mira Papa Dania marcha cu frente na laira banda di su compañeronan, cu ainda tabata na bida, riba dia di conmemora fayecidonan den guera. “Como Minister President mi a haya diferente oportunidad bunita pa scucha di nos schutternan, di e trabao cu nan a desplega den tempo di guera na Aruba. Papa Dania semper a conta mi e historia aki cu un sentido grandi di orguyo. Un personahe cu a considera core riesgo pa su Pais y hendenan como un honor”, asina MIke Emam ta corda.

E mesun sentido di compromiso aki e a desplega den su bida personal, su trabao y den su amistad cu su prohimo. Un icono di Dakota cu a bira un icono di Aruba. Un bida hiba simpel, trahando duro y semper inculcando respet y admiracion. Papa Dania tabata un bunita hende pa nos tur.

“Cu tur ternura nos Creador lo tum’e den su brasanan, manera Jose a stima y brasa su prohimonan. Na famia Dania y Dakota henter hopi forsa y consuelo. Nos lo corda Papa Dania pa semper”, asina ex-Prome Minister mr. Mike Eman a comparti e bunita recuerdo aki di Jose Maria Dania riba su pagina social.