E promotornan di Victory Extreme Figthing Championship (VXFC) ta den full preparacion pa presenta un magno evento di Extreme y MMA pa e pueblo di Aruba.
Esaki lo bay tuma luga dia 29 di juni 2024, ariba un diasabra, den Aruba Entertaiment Center. Durante e prome conferencia di prensa cu a tuma luga dia 3 di maart 2024 den Cas di Cultura, pueblo di Aruba y mundo henter por a sigui esaki di cerca via di 24ora.com.
Nos tin di bisa na e manera unico, hopi bunita y profesional cu a organisa e conferencia di prensa, tanto e bringado-, fanaticadanan y mirones ta premira un evento di un nivel haltisimo.
Loke a hala hopi atencion pa e anochi di pelea ta e momento cu e promotornan a CONFIRMA como invitado special un legendario bringado di Brasil di tur tempo, e ex-campeon mundial di UFC miho conoci tambe como “King of Rio!” Nos ta referi na
José Aldo da Silva Oliveira Júnior cu lo ta bringando pronto tambe den e UFC 301 aya na Brasl.
Cu e presencia di José Aldo pa e evento aki, nos di 24ora.com ta sigur cu e lo bay hala hopi atencion y lo ta un empuhe pa nos isla Aruba y su turismo. Alabes nos ta hayando tantisimo reaccion di prensa internacional y specialmente for di prensa di Brasil cu ta interesa pa bin haci cobertura di e evento aki.
E noticianan asina sigur ta trece un propaganda impagabel pa nos bunita isla. Esaki lo ta un bon oportunidad cu instancianan manera ATA, AHATA, gremionan comercial por gara pa haci mercadeo pa Aruba y su turismo strategicamente.
Tur nos siguidonan di 24ora.com por a presencia e fighting card cu lo ta consistiendo di 17 pelea total. E nombernan cu sigur a hala hopi atencion den e mundo di MMA aki na Aruba y internacional ta entre otro Damian Pinas, Clayton Raven, Johan Croes, Joziro Boye, Richard Williams, Evan Nedd, Hyram Rodriguez, Davon Duncan, Jean Marc Howell, Gerrick Bontekoe y tur e otro bringadonan cu tambe tin nan nomber traha y fanaticada.
Nos no por keda sin menciona Carlos “El Matador” Matos di Republica Dominicana cu tambe ta riba e fighting card y ta den full preparacion pa e prome evento di VXFC.
Un magno evento cu un trato VIP pa e bringadonan y tur hende cu ta bishitando e evento aki. Ya caba algun seccion di VIP ta sold out.
Nos di 24ora.com lo ta pendiente pa e siguiente anuncio di VXFC y ta desea nan tur clase di exito cu e tremendo evento tanto pa e bringadonan y Aruba completo.
