Durante un control di e Taskforce, cu ta un combinacion di Polis, Economische Zaken y DVG, a bin topa den un cas na Koningstraat un cantidad basta grandi di cocaina, marihuana, base, 20 mil florin cash, 1 revolver y 1 pistol.
Mirando cu e sospechoso J.A.R., conoci como “Ollo”, naci na Aruba di 40 aña di edad, ta biba di onderstand, a dicidi di confisca su brommer marca Suzuki.
A transporta tur locual a confisca y e sospechoso pa ward’i polis, unda e seccion di Crimen Organisa y Afpakteam lo continua cu e investigacion.
No ta prome biaha cu e sospechoso aki ta cay den man di husticia ni tampoco ta prome biaha cu ta bishita e cas specifico ey, situa patras di DIMAS. E ta un luga conoci pa Polis pero cu awe “pa casualidad” durante control pa Covid pa garantisa cu ta tene na regla di higiena y distanciamento social, a dal den un botin grandi.
Tabatin varios auto di husticia cu a yega na e sitio pa transporta tur material confisca.
E homber aki, aunke no ta traha ni tin entrada supuestamente, ta conoci como e posibel doño of operado di e kiosconan eytras, den cual ta huur apartamento, restaurant, pelukeria, car wash, etc. Awo e lo tin cu responde na autoridadnan con sin entrada y cobrando bijstand, por biba e bida cu e ta bibando awo.
