FC Barcelona tin un coach nobo y ta trata di e Hulandes Ronald Koeman di 57 aña. E Hulandes sa cu su trabou no ta uno facil cu e club Spaño.
Segun Koeman, tur hende sa cu Barcelona ta su cas y awo e tin oportunidad pa train e club aki. Esaki ta un soño cu a bira realidad, pasobra ta mustra cu nunca el a bay di eynan. Dialuna nan a kita Quique Setién y na Camp Nou a presenta e Hulandes. A contrat’e despues cu Barcelona a perde 8-2 contra Bayern Munchen den kwart final di Champions League.
Un di e prome tareanan cu Koeman tin ta pa papia cu Lionel Messi y convenc’e pa keda cu FC Barcelona, kende no ta contento cu e club. E ta papia di bay pa internazionale. “Messi ta e miho hungado di mundo y bo kier tin e den bo grupo, no como contrincante. Mi ta hay’e bon pa papia cu ne y lo ta contento si e keda,” el a expresa.
President di FC Barcelona, Josep Bartomeu, a bisa diamars cu lo bisa ayo na hopi hungado. El a menciona algun nomber, mientras cu Messi y Frenki de Jong no mag bay mes den zomer, pero ta cla p’e salida di hopi hungado bieu. “Un hungado di 31 of 32 aña no ta caba. Nan mester ta ansioso y kier duna e maximo. Tin hungadonan di 20 aña cu no ta ansioso. Nos tin cu busca e miho team pa gana weganan. Mi kier solamente hende cu ta bay mas leu. Si esey no ta abo, bo mester indica,” Koeman a bisa.
