Dia 22 di juli a tuma luga e exitoso festival di canto dedica na nos inolvidabel mama di cultura, Bernadina Growell-Kock. Na e festival a participa 18 cantante acompaña pa cinco diferente agrupacion musical, cualnan ta Grupo Cariño, Tipico Palisia, Grupo Un brindis, Grupo Sonido di Antaño y Tipico Pegasaya. Coro Esacala tambe a haci un bunita presentacion durante e festival.
Fundacion ta felicita e ganado di e festival Mario Kelly Jr. cu su cancion “Ta abo ta esun” cu Grupo Sonido di Antaño. Di 2 luga tabata Antonieta Ras Booi cu su cancion “Luna di Plata”. Alabes, Booi ta e ganado maximo di e festival anterior. Na di 3 luga tabata Hubert Ras cu “Wante Mami tur dos” cu e grupo Un Brindis. E cantante mas popular tabata Jhon Freddy Montoya cu “Cunucu di seit”. Dos hoben tambe a participa y a duna un bunita presentacion, esta Gilianny Wester y Edileine Nicolaas, compositor Laika Goeloe – Geerman.
Fundacion Bernadina ta gradici tur esunnan cu a haci e festival posibel. Ta gradici tur musico, agrupacion, cantantenan y huradonan. Ta gradici e publico cu semper ta acudi pa apoya nos cultura y folklore. Ta gradici director di Departamento di Cultura, Siegfried Dumfries y Jhon Freddy Montoya, Setar NV pa su sosten. Special danki na tur esnan cu a traha riba stage, Roland Jansen, Jhon Freddy Montoya, Angela Martines y Eldjean Kock.
Ta gradici alabes boluntarionan Betty Bislick, Lika Goeloe y Okkie Maduro. Tambe tur miembro di fundacion.
