Diasabra banda di 2’or y mey di merdia, a drenta informe cu un Jeep lo a baha for di caminda na Sabana Basora y dal den un baranca. Ta asina cu e Jeep Suzuki tabata riba caminda di Sabana Basora direccion pa Rooi Frances, ora e chauffeur a bira drenta e caminda di santo pa asina tuma e caminda pa bay e Santana.
Pero no a logra den su intento, ya cu el a tuma e lorada full malo, pasa rand rand banda di un steunpaal y banda di e palo di coriente, pa despues dal pega den algun baranca banda di caminda. Aki e Jeep a keda bon pega, mientras e chauffeur mes a scapa di haya golpi door di e impacto.
Polis di trafico cu a yega a constata cu e Jeep tabata tin number bieuw, papelnan no ta na ordo y e chauffeur tabata mustra bou di influencia di alcohol y unda e chauffeur masculino apenas por a para riba su pia. A keda nada otro pa detene e chauffeur y yama transportwagen pa bin busc’e y hib’e warda.Ora e detenido a cana pa e transportwagen por a nota bon cla cu apenas e homber por a para riba su pia. Takelwagen a bin despues pa kita e Jeep for di e barancanan.
