Campeonato HEINEKEN fast pitch di Aruba Softball Bond dedica na dos baluarte Jacobo Jansen y Gilbert “Nando” Maduro a continua riba cancha di Dragon Hitters.
Den categoria AA equiponan number 2 y 3 te cu awor den campeonato Jay’s Tire y Macuarima Spark Elektra a midi forsa contra otro. Jay’s ta piki 3 careda den cabez di promer inning pero mesora macuarima ta reaciona tambe cu 3 careda. Jay’s Tire ta anota dos mas den di dos inning pero Macuarima ta reaciona cu 3 pa hasi e wega 6-5. Den cabez di 3 inning Jay’s Tire ta tuma control di e wega anotando 7 careda.
Aunke macuarima a purba di bin bek pero tabata envano. Boxscore final Jay’s Tire 15 careda, 11 hit, 1 error y ta laga 5 coredor na base. Macuarima Spark Elektra 10 careda, 11 hit, 8 error cual tabata desatroso y ta laga 7 coredor den circulacion. Mihor bateadornan pa Jay’s Tire ta Jason Orman y Artoir Herrera di 3-2, Sando Geerman di 4-2 cu 3 careda anota mas 3 rbi incluyendo un triple, Sandrick Geerman di 2-1. Pa macuarima a destaca na plato Randolph Pinido y Javier Croes di 2-1, Ray Bernabela di 4-2 cu 3 rbi, Revelino Silie di 3-2 y e veterano Lucio Geerman di 3-3.
Gianmar Alders ta habri pa Jay’s Tire pero ta permiti 9 careda tras di 9 hit den 2 inning y ta wordo releva pa Jorge Santana Cortina kende ta permiti solamente un careda y ta seya e victoria riba su nomber. Carlos Croes ta bay 2 inning pa Macuarima permitiendo 5 careda tras di 2 hit y ta wordo releva pa Juan Chirino kende a permiti 10 careda di cual solamente 2 tabata limpi tras di 6 hit pa asina bay cas cu e derota riba su nomber. Weganan ta continua diaranson, diahuebs y diabierna riba veldnan na Pos Chiquito.
