Empuhe importante pa San Nicolas: Grupo Martinon cla pa e proyecto di hotel den Sero Colorado

E siman aki ainda ta yega e momento unda cu oficialmente lo concretisa 100% e proyecto di hotel den Sero Colorado. Banco Central e luna aki a duna e autorizacion pa e fondonan di e construccion di e hotel yega Aruba sin problema. E inversionistanan a prueba Banco Central cu e placa ta 100% limpi.

Tabatin un investigacion grandi di autoridad local certifica pa awe confirma cu no tin nada robes cu e grupo aki.

E hotel “five star” lo yama Secret cu un orientacion pa pareha.

Ta un hotel di 600 camber cu previlegio inlimita pa su guestnan y cu lo garantisa practicamente 100% di su ocupacion.

Esaki ta e marca di hotel pa pareha cu pa Apple Vacation ta considera como e top. Ta papia di un Apple Leisure Group cu ta uno di cinco strea. E doño di e hotel ta hopi positivo of super positivo cu Aruba. Parce cu nan ta na Aruba.

Pa San Nicolas y pa Aruba, esaki lo tin un impacto hopi grandi. San Nicolas a soña decadanan pa un proyecto manera esaki. Awo ta e momento cu claramente lo concretiza e proyecto. Cu e aprobacion di Banco Central y cu e placa presente na Aruba ta un prueba cu e grupo Martinon tin intencion serio pa cu Aruba.

Grupo Martinon ta un grupo grandi y serio na Republica Dominicana y Mexico pero tambe na Spaña. Cu e informacion aki como primicia, ta spera cu gobierno mes sali oficialmente y duna Aruba e bon noticia oficialmente cu ya caba a yega na nos.