“Carnaval 70 ta un pasado pa storia awor. Cu esaki mi kier bisa cu mi ta baha di e barco di guera cu yama ‘NFuzion cu a sa di nabega bon riba lama cu ta di tur sorto di caracter! Lama ta bruto, lama ta suave. Pero ora bo tin un bon capitan y tripulante, e barco ta nabega fuerte”, asina Jairo Maduro, kende di profesion ta un sacerdote diocesano di Bisdom Willemstad y sacerdote secular di Ordo di Predicadornan (Provincia di Colombia), pero cu den e temporada aki tabata conoci den carnaval como “The Priest” a skirbi.
ORIGEN DI E NOMBER THE PRIEST
Mi a yega cu Mighty Priest, pero Dolfi Richardson a sugeri “The Priest” pasobra e ta “The Commisioner” y asina e nomber “The Priest” a nace.
PASTOOR TA CANTA POWER SOCA
Esaki a cay di sopresa pa hopi hende! Pa mayoria e tabata OK, pero un otro grupo no a mira mi participacion cu bon wowo. D’Fiestah ta e power soca cu tres maestro musical a compone, esta Danny Koolman, Dolfi Richardson y Nigel Hoek. Musica bon combina cu por baila di forma trankil y cu su dinamica aden. Mi participacion ta resultado di un invitacion carga cu perseverancia di Ofo Escudero, pa despues di casi cinco aña mi ta kere, porfin ta haya un “si” pa Carnaval 70. Den prefinal e cantica y e personahe a hala hopi atencion y a scucha elegio sin fin pero tambe critica fuerte.
Mas cu claro, no por a sucumbi y mester sigui te final y esey tambe a tuma luga! ‘NFuzion a bay cu participacion musical fuerte y cu contenido den letranan, sin laga afo cu e creatividad cu cada cantante a presenta cu ne. Den e siman di final algun hende a molestia obispo mas pa mi participacion y tambe e uzo di clerical shirt na cantamento! Si mi ta un clerigo, ningun hende por kita mi derecho di e uzo di trahe cu ta pas pa mi estado di bida. Ademas, esey ta mi bisti di tur dia. Bisti ta algo externo, ta e alma alfin al cabo mester keda intacto den tur loke nos ta haci.
Dia di final di contest, ‘NFuzion a bin pa hisa benta duro duro! Mi cantica a resona cu hopi creatividad, un show tur afo cu hopi fantasia nunca bisto. Mi tabata hopi sigur di mi mes! E triki ta…scucha bo mes…conteo di tempo…traha cu rosea y tene tono! Nada di nervio aki. E mandato tawata cla…Bay haci bo cos! Esey Lyrod a bisa mi… Esey mi a bay haci. Mi sa kico mi a mira na e publico den tur dos biaha cu mi mester a canta. Un fayo tecnico a laga cu mi mester a canta un biaha mas, pero cu trot den bom mi a hisa benta atrobe. Pero…resultado final tawata otro. Mi ta respeta e resultado! Tog no tawata un festival di O.T.I Internacional de la cancion. Loke mi a haci tawata bon.
ROAD JAM DI PUEBLO?
Un radio emisora so a declara D’Fiesta como Road Jam, esey ta Radio Top FM 95 y Canal 22 y Chando Colina cu a bisti mi un medaya y a entrega un trofeo chikito. Y un pagina riba Facebook cu yama Aruba Records (Trece e medaya y copa pa pone den mi kantoor). Masha danki pa esey. Nos tur ta gusta gana ora nos ta haci hopi esfuerzo den algo, pero mi no ta sinti cu mi a perde nada. Instancia oficial mi no conoce ainda cu ta declara road jam oficial na Aruba. Mi ta felicita Galoway Jr cual ta un hoben cu tambe a bira Road Jam pa otro emisoranan di radio y Dios bendishona su bida como hoben y e keda semper den bon caminda. Mi ta contento cu e cantica D’Fiestah a pega tur caminda y mi por a present’e hasta na algun cas di hende grandi, algun bandanan a toca cu smaak y tres Brassband a toc’e y e Stealpand di e grupo di Sr. Lampe tambe a toc’e. Pa mi ta mas cu suficiente y specialmente muchanan chikito a siña e cantica hopi lihe.
ATAKE FUERTE Y BAHO CU BEIBEL DEN MAN
Esaki a sorprende mi un poco! E tempo aki y mi actividad musical a haci hopi hende core bay busca den bijbel e manera pa manda mi fierno pero sin muri. Tur esaki basa riba expresion di algun “pastoor” di algun Iglesia Cristian cu ta skirbi den prensa y algun programa di radio. Porta nan mester mas miembro pa nan iglesia como consecuencia di esey nan por biba mas den luho cu diezmo? Pasobra hopi biaha nan ta predica prosperidad den finanza, etc… y no e amor di Dios. Mi conoce algun di nan. Siendo sacerdote Catolico cu preparacion serio, den filosofia y teologia, hamas mi a siña pa uza palabra di Dios pa menasa, pa fomenta miedo, pa condena otro of tira diginidad di hende abou. Palabra di Dios ta historia di salbacion. Mas cu claro tin exortacion y spiertamento cu nos ta siña hende cu amor y pasenshi pa nan yega dilanti di Dios y no cu miedo y sinti nan yiu di Dios. Ora hende sinti compasion, eynan cambio ta cuminsa tuma luga. Pesey mi ta predica e amor di Dios cu ta yuda e hende pocopoco yega cerca Dios sin sintie condena.
Ta un falta di caridad grandi uzando forza bruto pa condena y cu bijbel den man. Nos no ta dilanti di un Dios bruto, sino uno cu ta amor. Dios cu ta warda semper riba nos. Hende cu bijbel den man a expresa cu mi a bira mundano! Mundano no, pero mi mester drenta mundo di tur forma y esey kiermen pa mi topa cu tur hende, tur hende sin excepcion. Drenta den hende no ta pa politiconan so. En fin, iglesia semper a yega na tur hende. Algun iglesia “cristian” a probecha e ora ey pa ataca Iglesia Catolico, pues nada nobo. Mi tin cu bisa si, tambe cu tabatin algun hende di mi mes un iglesia cu a tira duro riba mi!
‘NFUZION BAND, UN FAMIA
Ora pastoor yega un caminda, diripiente tur hende kier bira santo y serio den 1-2-3. Hahaha esey ta imposibel. Ni cu mi e no ta funciona. Mi sence of humor ta hopi marca den mi personalidad, a pesar cu mi cara ta manera un pan cera. Pa ami como pastoor por aporta algo di bida cristian na bo bida, mi mester sinta hunto cu bo, sin kita bo humor y cambia bo personalidad, si tin cambio cu mester tuma luga esey lo pasa pocopoco. Esey ta den man di Dios Amor. Mi a yeg’i haya un ambiente steif, musiconan cu cara di “soeur” pero no a dura hopi. Mustrando mi humanidad y cercania y mas ainda e sentido di humor, nos a kibra tur ijs hasta di Noordpool.
Despues di esey nos a cuminsa traha hunto di e miho manera. No tawatin barera, nos a bira un gran famia y esey pa mi tabata un gran experiencia. Un biaha mas mi a sinti mi na cas. Kisas Ofo lo a pensa den prome dianan “Pastoor tey! y awor ta con? Awor e mes por a mira con bon a bay. Na final di Carnaval mi por bisa mi ta “Proud” di boso tur. Ami ta baha awor di barco di guerra ‘NFuzion, boso sigui haci musica di altura. Corda esaki. Ora tin contratiempo, ta pasobra boso ta haciendo bon! Nos Señor a haci bon semper y el a end up na un cruz. Hende semper ta gusta kies cos malo. Nan a grita Barrabas en bes di Hesus! Mi bendicion pa boso. Danki pa e oportunidad unico aki. No ta tur banda por bisa nos tabatin un real “Priest” in the band! Boso a haci historia den Carnaval 70 y nos tawata pa nos cuenta.
EXPERIENCIA DEN CARNAVAL
Finalmente…mi kier laga boso sa cu desde mi a pone mi pia den e ambiente di Carnaval 70, Sahara Storm tambe a lanta y a calma. Hopi cosnan a pasa hahahaha. Pero mi a gosa hopi di e temporada. Pues, mi a bay pa gosa! Sin duda den e temporada tin competencia na cantidad y den competencia bo ta bay y haci bo cos y laga bo nomber den historia sea cu gana of no. Den mi caso, mi no a laga mi nomber so den historia, sino tambe di cada un di integrantenan di ‘NFuzion, cu kisas no a biba pensa cu un sacerdote Catolico ta bay hisa benta y canta y cumpli cu henter e rooster di carnaval. Ofo Escudero a kere y mi no a faya di haci un bon presentacion semper cu e banda musical.
Pa mi personalmente esaki tawata un logro grandi, mi no ta kere cu otro colega lo bay haci esaki (pa awor) pero mi a kibra e ijs si. Mi a sinti mi profundamente identifica cu mi mesun pueblo cu ta gusta haci carnaval na drechi, esta gosa ,baila y pasa bon. Mi a yega henter cas. Mi curpa y mi alma a keda intacto, pero cu mi cara bon kima cu e ta parce un spam hasa. Mi no sa di unda e energia a sali pa mi por a wanta tur e rutanan cu nos a presenta. Un cos si mi por bisa bo, cu “musica” ta keda algo magico. Un ambiente total di cuminsamento te fin.
Nos a host TOB y HOSPITAAL y tambe publico banda di caminda cu a gosa un bol di alegria y no di otro cos. Mi a topa asina tanto hende hende grandi cu a brasa mi te hinca mi bou di nan cocodek, e nebanan stima di San Nicolas cu ta mira mi na television na misa a mira nan “Priest” di cerca. Mi a sa di acerca nan cu mi alegria pa djis tene nan man un rato y mustra cercania, no papia mes di carnaval na Playa, nan a hala mi trek tur caminda pa saca potret y mustra mi nan aprecio. Mi a gosa hasta un tent riba Vondellaan dedica na “The Priest” cu hopi creatividad y fantasia sano. Mi a gosa di respet di tur hende riba caminda. Muchanan tawata goza cu e cantica y nan lo bay crece sin sinti miedo di un pastoor manera tawata antes. Nan por mira tur nos pastoornan di otro forma.
Porcierto, mi kier menciona e hoben Leandray Gomes cu den su curason caba mi ta mir’e cu un futuro musical grandi. El a para canta cu mi un rato D’Fiestah. Dios bendisiona su bida y e studia duro pa mañan e lo ta un gran persona di nos comunidad. Den e parada di scol mi a topa cu algun di mi misdienarnan cu tambe a gosa hopi. Un hoben a acerca mi, a brasa mi, mi no sa ken e ta y e ta bisa mi, mi ta contento cu pastoor ta hunto cu nos. Si, asina mes semper lo mi t’ey pa aporta den bida di e generacion nobo e balornan cu nan tin mester, sin crea barera y papiando cla cu nan y ta hunto cu nan.
Riba ruta semper prome cu cuminsa, semper mi a resa pa Dios compaña nos y pa tur cos bay bon y safe, pa cada un di e integrantenan, tecniconan, chauffeur di e truck y manera musica start, nos tabata bon conecta cu otro y nos tabata powerfull riba caminda, un cantamento sin stop…hala rosea bebe awe, of soda water, canta tur sorto di soca y pusha te final.
Mi participacion den carnaval tambe a laga nos Bisdom pronuncia su pensamento riba Carnaval (porfin!) cual documento ta splica hopi bon e posicion di iglesia cu carnaval. Algun a yam’e fiesta di “Diabel” y mil cos. Riba ruta mi no a topa e fulano ey y tampoco e no kier topa cu mi! Ora bo ta un hende di bida spiritual fuerte, e fulano ey ta keda leu di bo. E cosnan malo cu ta pasa semper ta keda bou di resposabilidad di e hende mes. Mi ta splica bo: buracheria, bringamento, etc. ta sali di e hende cu ta haci e cos cu no ta sirbi. Ken ta sali di cas cu gana pa end up den warda di polis of hospitaal of na un funeral home mes? Ami no! Finalmente, un experiencia mas.
QUIS UT DEUS? NEMO SICUT DEUS!
Ken manera Dios? Ningun manera Dios! Pa finalisa….Hahaha…Semper mi curason y mi fe ta na e luga caminda e mester ta. Tur acontecimento den mi bida mi ta gradici Dios pa nan. Pa e cosnan malo, esta pruebanan, mi ta tuma e actitud di Job den bijbel, pues mi ta gradici Dios tambe pa e cosnan menos bon. Semper mi ta dilanti di Dios cu conoce mi profundamente. Di berdad, mi ta gradicie semper cu e mes ta hiba mi e camindanan cu mi no ta spera. Pero ora mi sali intacto di e experiencia aki, mi ta tribi di bisa cu su man poderoso semper semper tabata cu mi. Kisas algun hende lo a spera cu algo lo a bay robes pa nan celebra….jammer! Bo sa dicon? Pasobra mi curason sacerdotal ta riba su altar tur dia. Dios mes a cuida mi bon! CARNAVAL 70…ADIOS. TABATA UN GRAN PLACER!
