Carnaval 70 ya caba ta tra’i lomba. Pero SMAC di un forma cu a sorprende tur hende, a manda yama un conferencia di prensa extraordinario.
Esaki tabata relaciona cu e situacion cu a surgi entre Stichting MUSICA y SMAC pa loke ta trata organisa e festival di Caiso & Soca Monarch.
Presidente di SMAC, Darren van Ommeren a cuminsa na duna un recopilacion di e temporada di Carnaval 70. SMAC riba su mes ta hopi contento con e evento- y paradanan a bay, c’un Carnaval 70 super exitoso, cu trintinuebe evento den mas o menos 6 siman. Esaki tabata inclui e evento di 11-11 ultimo y cu a termina den e magno evento di diadomingo ultimo.
Aruba por a disfruta di un tremendo parada y tabata danki na tur e musiconan cu a haci esaki posibel, unda cu tur hende por a disfruta, incluyendo nos bishitantenan, tanto di region como di otro partinan di mundo.
Van Ommeren a bisa cu pa e siguiente temporada di Carnaval 71, e kier laga tur cos cla. El a bisa cu nan a manda un email pa Stichting Musica unda cu a duna nan un oferta pa nan carga e festivalnan di musica, lo ta necesario pa nan organisa e festivalnan di musica durante Carnaval. Un oferta pa tin e fecha pa e Caiso & Soca Monarch na balor di 25 mil florin, pa contribucion na SMAC pa organisa esaki.
Pa di dos, pa nan tuma e festival di Calypso & Roadmarch Infantil y Hubenil na balor di 15 mil florin como pakete. E di tres oferta ta pa MUSICA tuma henter e pakete di musica, cu ta encera Calypso y Roadmarch Infantil y Hubenil, como tambe Caiso & Soca Monarch, Tumba Infantil y Hubenil y tambe Grandi, ya cu nan no mester paga nada na SMAC y cu nan mes lo para responsabel pa tur e gastonan cu organisa e festivalnan aki ta trece cu ne.
Pa dia 4 di maart nan lo mester duna SMAC un contesta, cual di tur e ofertanan aki Stichting MUSICA lo bay di acuerdo cu ne. Den caso cu nan acepta, SMAC lo zorg pa no tin niun evento riba e mesun dia y asina yuda na eleva e festival aki.
A yega na e decision aki despues di a reuni cu e miembronan di directiva, pa por yega na un punto delinea pa evita cu e situacion ta sigui pasa den futuro.
Tin cosnan cu ta pasa pasobra cu hopi cos no tabata documenta. SMAC a zorg pa haci esey, a ofrece nan un oferta y ta spera riba nan reaccion, pa traha un contract cu lo defini e futuro di e festival aki.
Pregunta ta keda, cu si Stichting Musica no tuma e oferta aki, niun di nan, kico lo pasa cu e festivalnan aki. Segun van Ommeren, lo mester sinta hunto pa traha hunto pa e festivalnan di musica.
Pa SMAC, en general nan ta contento con e temporada a bay. Ya caba lo bay cuminsa traha pa trece mas participante p’e eleccion di Prins y Pancho, door di acerca e scolnan hunto cu e preparadonan pa asina sigura e existencia tambe di e eleccion aki.
