Director di dr. Horacio Oduber Hospital (HOH), Jacco Vroegop, ta contradeci ponencianan treci dilanti door di e presidente di sindicato ABV (Arubaanse Bond van werknemers in Verplegende Instellingen), esta Gina Maduro. Ta papia di un carta cu a pidi pa hala aden y cu a duna e empleadonan te cu 12:00 di awe merdia pa hacie.
Director di hospital den su declaracion a trece puntonan dilanti cu e no ta di acuerdo cu Gina Maduro. E prome punto ta ora cu ta papia di discriminacion. E hospital no t’ey pa Rubianonan so pero pa tur hende aki na Aruba. Esey e tabata kier a pone bon cla! Pero tambe pa loke ta trahadonan, pasobra si ta Rubiano so mester traha den e instituto aki, “anto e lo mester a cera porta. Esey ta lamentabel. Nos mester di otro pa yuda tur e Rubianonan y tur otronan riba e isla cu mester di e cuido di un hospital,” asinaa Vroegop a splica. Pa e motibo aki e ta haya hopi lamentabel cu e presidente di e sindicato ABV ta discrimina y ta spera cu e hendenan cu a bati man, no a scucha bon loke e sindicalista a trece dilanti “pasobra nos t’ey pa tur hende. Nos ta un hospital inclusivo.”
Pa loke ta e C.A.O, a negocia durante mas di un aña riba esaki y semper Maduro tabata presente. A logra firma esaki na november y na januari finalmente el a keda completamente introduci. Un CAO den cual mas o menos 16 miyon florin extra ta bay pa e trahadonan den tres aña. Esaki ta separa di 10 miyon florin pa luna cu HOH ta paga na salario di su trahadonan. “Nunca antes un directiva a hinca asina hopi placa den un CAO pa e trahadonan. P’esey ta lamenta cu Maduro ta lubida esaki y cu conscientemente el a firma pa tur e hendenan cu e ta representa. Mi no sa si el a perde parti di su memoria den su ultimo vakantie. Pero nos a bay mesa pasobra dos trahado a manda nos un carta.”
Vroegop a enfatisa cu nan a ricibi e carta y a contesta esey. “Nos no tabata sa cu Gina Maduro tabata den background probablemente tabata cu e hendenan aki den combersacion pa fomenta inkietud. Esaki ta lamentabel pasobra conscientemente el a firma e CAO di november cu su bentaha y desbentahanan. Mi ta spera cu el a conta e trahadonan tur esey.” Banda di e 16 miyon hinca den e CAO ta haci diferente otro cos pa mantene trahadonan contento, manera ta duna nan liber riba nan fecha di cumpleaños. Tur esaki pa crea un bon ambiente na pia di trabou. “Si un trahado no ta contento, no ta brinda un bon cuido.”
Tampoco e ta di acuerdo cu ponencia di Gina Maduro riba e aspecto di intimidacion. “Mas bien hospital ta intimida pa Gina Maduro. Mi ta lamenta cu ta crea un tendencia aki pa percura cu Maduro ta logra algo cu hopi tempo pasa el a palabra y acepta y awo kier hala atras riba dje.”
Pensamento di hospital ta pa organisa un referendum bou di personal riba e CAO firma. Si ta di acuerdo ta sigui, si no ta di acuerdo, lo para e CAO. Esaki ta encera tambe cu ta para tur e inversion di 16 miyon cu a hinca den e CAO nobo aki. Esta ta stop e indexering, periodiek, etc. Lo para tur adelanto y bay negocia di nobo. Hospital ta spera di berdad di por sinta na mesa riba e problema di awo y pa yega na un solucion.
Pa loke ta e problema di pauze mes, el a bisa cu dos trahado a manda carta pa directiva y a sinta na mesa cu e dos personanan aki. “E trahadonan a hala e carta aden, pero despues a bolbe hala atras, riba presion di e sindicato.” Tambe el a splica cu e motibo cu a pone un ultimatum, ta pasobra e trahadonan cu a manda e carta ta bisa di ta renuncia na nan contracto. Esey ta para den e carta. “Nos a keda puntra nan si ta para riba e carta. Mi no por kere cu nan ta realisa kico nan a haci y mi ta kere si cu e ta un wega di e sindicato.”
Trahadonan di hospital tin un bon acuerdo laboral, semper por ta miho. No mester lubida cu a inverti 16 miyon den e trahadonan y e ta trece cu tin obligacionnan pa cumpli cu nan tambe: brinda un bon cuido. Tur cos ta draai rond di e 30 minuut di pauze, cu den ley ta para cu tur trahado tin derecho riba dje. Pero e problema ta cu kier tuma e trinta minuut di pauze den oranan di e doño di trabou. Pues cu en bes di traha 8 ora pa e instituto, nan kier traha 7 ora y mey. Y esaki ta contrario na tur resto di hospital, cu ta algo cu directiva no por bay di acuerdo cu ne.
“Nos ta pagando nan pa 30 minuut pa nan come en bes cu nan ta produci pa hospital, pa brinda cuido na e pashentnan. Pues nan kier pauze pero no kier cuminsa mas trempan of caba mas laat, manera mayoria trahado den hospital. Tur hende mester haya trato igual.”
Jacco Vroegop no por kere cu e sindicato ta lucha pa discriminacion entre trahadonan, unda cu algun si ta haya e pauze aki manera ley ta prescribi y otronan ta tuma esaki den e ora di trabou.
Ultimo el a trece dilanti cu dialuna anochi e abogado di sindicato ta bisa cu nan kier sinta na mesa, mientras cu awe mainta tabatin accion.
