Aruba Tourism Authority (A.T.A.) a anuncia cu a firma acuerdo di un aña cu Fundacion Parke Nacional Aruba (FPNA). Cu e acuerdo strategico aki, A.T.A. ta reafirma su compromiso pa sigui traha di cerca cu FPNA como un sosten mutuo pa e esfuersonan continuo den proteccion y preservacion di nos naturalesa.
A.T.A. ta reconoce cu e necesidad pa enfoca riba un desaroyo turistico duradero y sostenibel ta di suma importancia como un esfuerso comun. Uniendo forsa, nos por garantisa cu nos pilar economico principal ta keda un fuente di entrada vital pa e añanan binidero. E vision di A.T.A. ta basa riba e modelo di ‘High Value – Low Impact’ cu ta para pa un balanse entre cuater pilar cu ta e ‘Calidad di Bida di e residente’, ‘Calidad di Experiencia di e Bishitante’, Proteccion y Preservacion di Naturalesa & Medio Ambiente, y Contribucion Economico di e Sector Turistico’.
Pa hopi aña caba A.T.A. ta provee sosten na FPNA pa cu e inversionnan den e proyectonan unda turismo y naturalesa por coexisti. Ademas A.T.A. lo sigui pone fondonan disponibel pa mantencion y renobacion di diferente sitionan turistico, asina mehorando siguridad, accesibilidad y experencia di e local y bishitantenan di e isla y alabes maneha e impacto di e bishitantenan riba naturalesa.
E acuerdo cu a firma ta enfoca riba proyectonan infrastructural, manera e proyecto di mantencion di railing, e trapinan y otro facilidad entre otro na Conchi, Dos Playa, Boca Prins, Grot Fontein y Grot Quadirikiri den Parke Nacional Arikok, y tambe lo coloca “boulders” na saliña Malmok pa limita trafico.
Como e entidad encarga cu maneho y mercadeo di nos isla, A.T.A. lo asisti tambe den promocion corecto di experencianan autentico den y rond di e areanan cu ta resorta bou di FPNA. Particularmente lo percura pa aliniacion den e esfuersonan di comunicacion, lo enfoca riba codigo di conducta informando bishitantenan di entre otro e reglanan y ley, y lo brinda mas informacion y educacion referente nos parhanan y nos naturalesa.
A.T.A. lo pues sigui traha di cerca cu FPNA pa maneha bishitantenan di un manera cu ta minimalisa daño na naturalesa y medio ambiente mientras ta promove sostenibilidad. Esaki mescos cu a bin ta haci, unda entre otro a inverti den Mangel Halto, y tambe a coloca “boulders” na Sasarawichi.
E colaboracion strategico aki ta nifica tambe cu A.T.A. lo obtene informacion y data mas concreto di e bishitantenan traves di un proyecto nobo cu lo lansa otro luna, esta e eco-counter cu lo midi e fluho di bishitante na e areanan natural di Aruba y habilita pa adapta maneho den futuro.
Traves di instalacion di eco-counter na diferente localidad cu trafico halto di bishitante, A.T.A lo por provee data cu lo yuda cu miho planificacion. E eco-counter ta ofrece un solucion cu ta conta y analisa peaton traves di un scan cu ta garantisa e privacidad di bishitantenan. E areanan cu lo mira instalacion di e eco-counter ta inclui Conchi, Grot Fontein y Spaans Lagoen, pa cuminsa, cu ta cay bou di maneho di FPNA.
“Nos ta sumamente entusiasma pa sigui colabora cu FPNA den nos mision mutuo pa preserva y proteha nos tesoronan natural y nos medio ambiente. Esaki ta un paso importante pa nos comunidad y turismo di Aruba den su totalidad. E acuerdo di colaboracion aki ta cubri un total di mey miyon florin cu ta inverti pa duna sosten y realse na e causa comun y ta un muestra di compromiso entre A.T.A. cu FPNA, un compromiso cu ta ancra den A.T.A. & FPNA su plan di maneho multi anual”, tabata e palabranan di CEO di A.T.A. Ronella Croes na e ocasion aki.
“Fundacion Parke Nacional Aruba como un organisacion independiente di maneho di conservacion di naturalesa den areanan terrestre y marino na Aruba ta sumamente contento di por firma un acuerdo di colaboracion cu A.T.A.”, Tyson Lopez, Chief Executive Officer, FPNA ta comenta. E colaboracion lo reinforsa FPNA su direccion manera ta poni den nos Multi Annual Corporate Strategy 2023 – 2032 di traha pa yega y atrae un tipo di turismo cu ta mas consciente di nan impacto riba naturalesa door di informa, educa y ofrece experiencianan sostenibel cu ta crea e transformacion den nos bishitantenan cu tin un aprecio sosteni y un sentido di responsabilidad pa naturalesa.
Tocante Aruba Tourism Authority (A.T.A.)
Desde prome di januari 2011, Aruba Tourism Authority ta opera como un entidad ‘Sui Generis’. Un organisacion independiente den e esfera publico. Aruba Tourism Authority ta fungi como ‘Destination Marketing and Management Organization (DMMO)’ y ta responsabel pa uni interes turistico entre socionan local e internacional. A.T.A. ta pone hopi enfasis riba e modelo di “High Value-Low Impact” cu ta para pa un balans entre aumenta e balor economico di e bishitante, posiciona Aruba como un pais desea y sostenibel, y posiciona Aruba como lider di desaroyo como un destinacion. Cu meta pa sigui mantene e esfuersonan den linea segun e balans menciona, y logra aumenta entrada pa medio di calidad di turismo en bes di e volumen cu nos destinacion ta ricibi. Capacidad di carga ta sigui ricibi atencion di parti di A.T.A.
