Ronneke Kats VAR (Verpleegkundige Adviesraad), hunto cu Gregory Croeze (di Hunta di Directiva) y Kim Geurtsen (HR Manager) ta apoya e director Jacco Vroegop den su pensamento cu na e momentonan aki no tin nada incorecto a tuma luga pa cu trahadonan di hospital.
Tur cos ta draai rond di un carta cu dos trahado di Operatiekamer a manda pa gerencia pa expresa nan malcontento relaciona cu tumamento di pauze.
Trahadonan ta bisa cu no tin tempo pa tuma pauze y gerencia ta bisa cu awo ta tuma e pauze den oranan di e instituto y esaki ta loke cu nan kier cambia. Esta en bes cu nan ta traha shete ora y mey, pa nan traha ocho ora, mas e mey ora cu mester hinca memey pa nan pauze. Esaki, e sindicalista Gina Maduro, ta bisa ta e carta cu dos trahado a manda pa gerencia unda ta pidi solucion.
Ronneke Kats di VAR di su banda a bisa cu dialuna a papia cu e trahadonan, y loke cu e por a compronde ta cu nan ta sinti cu no ta scucha nan. Sinembargo despues a compronde cu tabatin diferente reunion prome cu e cartanan aki a bay pa gerencia. A mustra nan cu e asunto di pauze ta para den e CAO cu a firma na november ultimo y tur trahado a para tras di e acuerdo e tempo ey. Fastioso ta cu awo, cinco luna despues, ta bolbe riba e punto aki. Den tur e cinco lunanan, cu a haya e otro beneficionan, a lubida di e parti aki cu tambe ta forma parti di e CAO.
El a bisa cu el a pidi nan pa keda habri pa combersacion y no bay den menasa.
Kim Geurtsen di Recurso Humano di su banda a recorda e sindicato cu semper e prome meta di hospital ta percura pa un bon cuido pa e pashentnan. A splica durante diferente sesion a splica cu e asunto di 30 minuut di pauze no ta algo nobo den e CAO di november ultimo, sino ta data di 2019. E tabata hinca den un protocol. E CAO, cu ta riba ley, ta bek y uno moderno. E ta e fundeshi pa sigui traha riba dje den futuro.
P’esey e ta desapunta den e uzo di palabranan cu por indica discriminacion den un discusion entre e partidonan. HOH lo sigui combersa pa splica tur hende kico e proceso ta encera.
Gregory Croeze, di Raad van Bestuur, a sigura cu nan tin oido pa tur partido envolvi. Si nan ta lamenta pa scucha cosnan cu no ta cuadra cu realidad. Durante un aa largo a sinta na mesa, sin ningun walkout. Semper a combersa bon te cu a logra yega na un CAO di tres aña, unda cu a compromete pa duna 80% di tur e placa cu ta ricibi for di AZV bek den empleadonan.
E ta cuestiona palabra manera “no tin empatia pa e empleadonan” uza door di presidente di ABV. A duna hopi na empleadonan. E 30 minuut di pauze ta algo di hopi aña y 60% di hospital ta haci uzo di e pauze aki. Awo loke cu kier a haci ta pa harmonisa esaki pa no tin diferencia entre trahado di departamentonan.
