Tras reunionnan sosteni e siman aki relaciona cu e Landsverordening Normering Topinkomens (LNT), presidente di Organisacion di Pensionadonan Publico di Aruba (OPPA), Ivo Valdes a manifesta su preocupacion grandi pa e futuro di Algemeen Pensioenfonds Aruba (APFA). Den mesun rosea ta argumenta cu e inclusion di APFA den e ley aki no ta sirbi Gobierno di Aruba ningun proposito pasobra ‘ni un dipchi nan por haya di esey’, segun Valdes.
Cu e ley di LNT ta pa tur e NVnan di gobierno, esey si Valdes ta wak logica den dje pasobra gobierno ta hinca placa of tin placa hinca eyden, pero esey no ta e caso den APFA. “Gobierno no tin nada di haci cu APFA. Unico cu ta haci ta entrega e prima cu el a retene di e trahadonan y alabes e tin cu agrega su parti. E ta entrega esey na APFA y APFA mester traha esey pa trece un rendimento positivo sigurando cu despues di un cierto tempo, cu e trahado yega su edad di pension, e por cobra su pension sin peliger. P’esey e fondo t’ey. P’esey a privatis’e, p’esey el a bira independiente; pa gobierno no tin nada di mishi eyden,” Valdes a afirma.
