Augusto Juni Martis, presidente SEU, sindicato cu ta representa trahadonan di compania Aqualectra na Corsou a declara pafo di Parlamento di e isla cu e calculonan den e ley di normering topinkomens no ta bon, lo mishi cu salario di tur trahado, reduciendo esaki cu 27.5% y poniendo nan CAO den peliger. Nan ta boga parlamentarionan pa duna tene debido cuenta cu esaki y pa haci e cambionan necesario prome cu ta aproba e ley.
Mientras cu tabatin un reunion di comision central andando paden di edificio di parlamento den Punda, Martis y un compañero di sindicato a duna e declaracion pafo bisando e manera con e ley ta hinca den otro, no ta conta pa director so, pero pa tur otro trahado di companianan estatal.
E sindicato a aclaria cu nan no ta contra ley, y ta di acuerdo cu e ley mester bin, pero calculonan den e ley no ta corecto y ta mishi cu CAO di trahadonan. E argumentonan aki ta basa riba un carta cu director di Aqualectra a manda pa SEU, ademas di e otro dos sindicato cu tin representacion den e compania di utilidad.
Den dicho carta ta indica cu a base di e pregunta di Parlamentario y contesta di gobierno te cu awo, Aqualectra ta conclui cu e suma di 263 mil florin (como maximo cu un trahador por gana) ta inclui tur cos; banda di e salario, tambe premienan social, vakantiegeld, eindejaarsbonus, tur sorto di compensacion, toelagen, pensioenpremies y gasto, jubileumgratificaties, etc. Tambe ta señala cu ta baha salario di tur trahado cu 27.5%
“Si bo tumb’e esun ariba asina drastico, e tin un domino effect riba e resto te na e funcion mas abou,” asina sindicalista Martis a splica. Esey ta nifica cu e salario maximo na Aqualectra no por surpasa 12.700 florin pa luna y e compania a duna di conoce cu bou di e normanan ey, nan no por garantisa e cumplimento di e CAO existente.
