Aruba e siman aki ta den ambiente di e fiesta di Halloween y Island Fest “goes orange” den nan di cinco edicion. Diaranson, 30 di october, pueblo di Aruba ta invita pa subi pariba y disfruta di Island Fest cu desde su introduccion a bira un exito. E ta un evento unda pueblo ta topa otro.
E biaha’ki e Island Fest, cu ta tuma luga den curason di San Nicolas – ta trece un poco di e celebracion Mericano cu a bira un celebracion mundial, inclusive na Aruba, esta Halloween. E lo bay ta un anochi yena di ambiente cu tentnan di trick or treat specialmente pa e muchanan.
Manera ta un tradicion caba, e anochi ta habri cu musica di Sodo y Cuero cu sigur ta un atraccion grandi pa e bishitantenan di Aruba, pa nan cera conoci cu algo di e folklore di e isla cu nan a bishita. Pero pa e localnan tambe e ta un atraccion, specialmente pa keda recorda e hobennan riba loke ta di Aruba.
Pa esnan cu a yega di bishita Island Fest, sa cu e siguiente parti di e anochi, despues di apertura cu musica di Sodo y Cuero, ta e “Historical Show” cu ta algo masha bunita pa filma y saca potret. E ta presenta historia di Aruba y ta bay compaña pa e musica di brassband, Asambeho, cu ta wordo presenta pa Massive Brassband.
“Historical Show” ta presenta pa e hobennan talentoso di The Popcorn Dancers. E Island Fest ta cuminsa for di banda di Nicolaas Store sigui te na e parkeerplaats di Arubus. Riba e ruta aki, High Rise Strip, ta bay tin ambiente den man di The Joyride Band. Pero tambe riba e ruta ta haya diferente tent di cuminda, bebida y di souvenirs. Loke ta algo nobo den Island Fest e siman aki ta cu pa prome biaha tin “doorprizes”.
Island Takeover, cu ta tuma luga e fin di siman aki, ta bini cu su “warmup party” y pone e publico den ambiente di musica di entre otro U40. Y pa cera e grandioso anochi di e di cinco edicion di Island Fast e grandinan di Aruba, Tsunami ta bay pone San Nicolas y e bishitantenan riba pia, sacudi e curpa hunto cu turistanan y a mustra nan cu “esaki ta nos manera di biba”.
