Un poco despues di mey anochi a tuma luga un accidente pisa riba Green Corridor na altura di Young Fellow Bar & Restaurant. E heridonan a resulta di ta integrantenan di e banda Le Groove. E grupo a caba di toca na un evento na Dakota.
E auto marca Nissan modelo March (RHD) tabata bayendo ariba ora e chauffeur a perde control riba stuur un poco prome cu Young Fellow. E vehiculo a dal den e baricada di santo, pasa over pa e otro banda di caminda y a ranca un palo di luz.
Segun por a compronde, e vehiculo a keda lastra, dal den vangrail, bolter y bay keda na un distancia di casi 150 meter leu di e impacto inicial.
Den e vehiculo RHD tabatin 5 persona kendenan a wordo transporta pa hospital den 2 ambulance. Nan a ricibi herido masha leve.
