Cerca e departamento aki di gobierno ta ricibi tanto keho di pashent, como tambe di dunador di cuido. E keho mas comun entrega pashent ta esun di ‘onbereikbaarheid’, esta cu e dunador di cuido no ta accesibel; p.e. cu su oficina no ta contesta telefon, entre otro.
Frances Rugebregt, relacionista publico di Inspectie Volksgezondheid Aruba (IVA) a duna di conoce cu, en realidad, ta e dunadornan di cuido mes ta responsabel pa atende cu e kehonan, pero semper por haya sosten di e departamento si no sa unda pa bay of kico mester haci.
Rugebregt a splica cu IVA ta traha un carta pa informa e dunador di cuido cu tin un keho entrega contra dje. Esaki ta semper cu e pashent ta desea. Tin kehonan cu ta opta pa keda anonimo; e ultimo aki ta presenta mas tanto ora cu ta denuncia practica ilegal di medicina. Loke ta importante ta pa haya e keho riba papel y oficial. “Hopi biaha ta haya denuncia cu ta bisa cu ta hende hopi conoci cu casonan andando of tin luga caminda tin persona ta traha ilegal, pero si no tin prueba of no tin un denuncia oficial caminda e denunciante ta splica ki informacion of prueba e tin, ta dificil pa IVA actua.”
Ta importante pa e entidad traha di un manera transparente y tin lo necesario pa haci su mesun investigacion. “Si tin un dossier opbouw miho e ta pa por bay haci investigacion mas profundo y actua; esey pa nos ta importante. Nos tin nos manera di traha pa nos sa precies a base di kico nos ta actua.”
Mas durante e periodo di covid, cu tabatin hopi presion riba cuido medico, a ripara cu tabatin hopi keho tocante falta di acceso of acceso dificil.
