Siman pasa e team di Cure en Care di Inspectie Volksgezondheid Aruba (IVA) a caba cu e prome rond di bishita/inspeccion anuncia na tur casnan di cuido registra na Aruba.
En total a bishita 15 cas. E rond di bishita aki tabata pa cera conoci cu e organisacionnan, nan empleadonan y nan manera di traha. Pues, e tabata un ‘nulmeting’ pa haya un bon bista di e situacion actual di e casnan di cuido na Aruba. Durante e inspeccion a controla si nan ta cumpli cu e reglanan den e Ordenansa Nacional Cas di Cuido (Landsverordening Verzorgingshuizen) cu a drenta na vigor dia 1 di augustus 2016. Actualmente IVA ta trahando riba e rapportnan individual di tur casnan di cuido cu lo wordo entrega na e casnan hunto cu e recomendacionnan.
E rapportnan aki lo wordo entrega tambe na e Seccion Cuido di Nos Grandinan cu ta resorta bou di Departamento di Salud Publico. A base di e rapportnan aki, e seccion mester crea liñanan di maneho pa garantisa e nivel di calidad di e casnan di cuido. Riba e normanan aki, IVA lo bay sigui controla den futuro. E siguiente bishitanan/inspeccionnan di IVA lo no ta anuncia.
