Señor redactor, permitimi e espacio aki pa expresa mi inkietud. Danki di antemano na bo cooperacion pa publica esaki, pasobra mi ta kere cu no ta ami so ta pasando aden, sino hopi mas famia.
Den e ultimo dos dianan a tuma luga un suceso caminda cu un famia, consistiendo di mama, tata, yiu, ruman, primo, omo, noem maar op, a cana drenta den cas di un familiar dimi y nan intencion ta pa parti sla. Despensa un biaha ma pa e manera bruto di expresa, pero no tin otro manera. Y e cos di mas pio ta, e mama, kende ta un Docente di Enseñansa Special, tabata busca e yiu di 12 aña pa bati. Con por ta posibel cu un docente, kende ta e persona di mas cerca na un mucha, despues di e mayornan, por tuma autoridad den su man, drenta cas di hende anto busca mucha pa bati?
Con por ta posibel cu un juffrouw di scol, kende ta para dilanti di klas, anto pa colmo duna les na muchanan cu problema di siña, ta busca un menor di edad pa bati?
A caso e ta mustra profesionalismo haciendo e acto eynan? Acaso loke el a haci ta hustifica pa kico cu por a pasa entre e dos famianan aki, cu bo ta cana drenta cas di hende anto busca mucha pa bati?
Na prome luga, loke el a haci ta abuso di menor, pasobra ta un mucha di 12 aña, cual ta castigabel pa ley. Di dos, violacion di regla di polis, pasobra e famia specifico aki ya caba a wordo taha di no pasa dilanti di e cas menciona, pasobra ya nan a yega di busca problema caba cu e famia particular aki cu ta biba den Gielstraat.
Esaki ta un muestra cu no solamente problemanan social ta hopi, pero problemanan psicologico tambe ta hunga un rol, pasobra tanto e juffrouw aki cu su casa, ta hendenan cu no ta mal para, pero asina mes ta tuma un actitud bochornoso y si a cana drenta den un cas caminda cu tin henter un famia ta biba, pa haci y deshaci.
Unda sano huicio a keda, pasobra como supuestamente Juffrouw di Scol, bo mester por sa con pa dialoga cu un hende, of ban pone na un manera mas di mucha di scol, bo por sinta papia.
Kerida Juffrouw di scol, bij deze mi kier a ponebo na altura cu bo caso ya caba ta na Recherche, Onderwijszaken lo wordo poni na altura, Inspectien di Enseñansa y tambe Minister di Enseñansa. Tipo di hendenan asina nos no kier pa duna les na nos yiunan. Ami tambe tin yiu, y nan tambe ta special, nan tambe a ricibi educacion di profesionalnan, kendenan mi ta aprecia masha hopi mes pa nan pasenshi y dedicacion. Pero un persona manera abo, por Dios, no merece di wordo yama Docente. Bo no ta un ehempel, bo no ta un rolemodel. Pa bo haci bon, bo mester pidi e famia aki despensa pa loke abo a comete, trece trauma cerca muchanan den e cas, aunke algun di nan si a sa di defende nan mes. Entrega bo mes, admiti bo eror y esun di bo hendenan y corda, Karma ta bin bek pa loke un hende a haci den su bida…
Danki Señor redactor pa e espacio concedi.
