A base di notificacion ricibi Riba diabierna 6 di november 2020, Inspeccion di Salud Aruba (IVA) a haci un bishita di inspeccion na un practica ilegal di dentista/orthodontista. A constata cu ta trata di un persona di cual IVA a yega di cera su practica caba na comienso di 2019 pa motibo cu e no tabata autorisa pa haci tratamento di cuido oral na Aruba manera, entre otro, e Ley di Calidad di Cuido ta prescribi.
A inform’e na 2019 ki estudio e por haci y ki pasonan pa cana pa por traha legal como dentista/orthodontista na Aruba. Pero, el a bolbe cuminsa traha despues di e advertencia y orden di IVA pa no haci esaki tanten cu e no ta autorisa. Durante e bishita di inspeccion na e practica, a confisca tur material manera remedi, imprenta dental y otro instrumentonan dental. Practicanan ilegal ta forma un peliger grandi pa salubridad publico na Aruba pa motibo IVA cu no por evalua e competencia di e dunadonan di cuido cu ta traha den e practicanan aki.
IVA ta evalua aspectonan di calidad y siguridad di cuido, manera entre otro higiena, siguridad di medicamento, registracion di
pashent den file y kehonan ricibi. Na practicanan ilegal, no ta garantisa bon calidad di cuido, cu ta sigur pa e pashent. Pues, pa motibo cu e persona aki no tin su decreto ministerial of un landsbesluit pa por traha na Aruba, IVA a dicidi di confisca e materialnan den su practica pa investigacion riguroso. Ademas, polis a detene e persona.
Cu e bishita di inspeccion aki, IVA ta informa tur dunado di cuido cu lo no tolera practicanan ilegal y cu lo tuma medidanan serio ora ta trata violacion di ley. Alabes, IVA ta recorda comunidad cu tin riesgonan grandi envolvi ora di ricibi tratamento medico for di personanan cu no tin e autorisacion y/of e competencia y educacion rekeri. Esaki ta pa motibo cu nan no por garantisa cuido di bon calidad cu ta sigur. Por ehempel, si materialnan no ta sterilisa adecuadamente, pashentnan ta core riesgo pa contagia cu malesanan manera Hepatitis B y AIDS. Tambe, por tin consecuencianan serio pa e salud si pashentnan ricibi medicamento cu no a evalua, cu a caduca y/of cu no ta warda segun standard profesional.
Pa ley, tur dunado di cuido tin e responsabilidad pa garantisa cuido di bon calidad. Pues, ta hopi importante pa informa bon prome cu dicidi di ricibi cualkier tratamento medico. Pa siguridad di tur pashent, ta hopi importante pa e dunado di cuido tin e autorisacion rekeri y ta registra na DVG.
Si tin cualkier persona cu lo por ta na altura di tipo di casonan similar, por tuma contacto cu IVA telefonicamente na 526-2160, via whatsapp na 593-6373, via Facebook of via email na [email protected].
