Na caminda pa nos proximo eleccion tin varios grupo di interes cu ta promove atencion pa esnan cu nan ta representa. Asina nos ta mira atencion pa millennials, atencion pa penshonado y atencion pa esnan cu ta representa e sector laboral.
Iglesianan Cristian di Aruba kier a presta atencion na e balor di e voto Cristian den eleccion en general y den e proximo eleccion en particular. Tin hende cu ta boga pa separacion di religion y estado pa asina limita influencia di balornan Cristian den gobernacion y politica. E pregunta mas importante cu cada Cristian mester haci su mes ta: Dios ta interesa den gobernacion y den eleccion? Iglesianan Cristian di Aruba a invita Dr. Veronica Evelyn di Barbados pa trece un charla riba e topico aki riba diabierna 8 di september 2017 na Renaissance Convention Center di 7:30 pa 10:00 pm. Dr. Evelyn ta un experto den cambio di comportacion for di un punto di bista Cristian den nacionnan chikito. Dr. Evelyn ta bon conoci den Caribe como un promotor di norma y balor den sector priva y den sector publico. Despues di e charla publico por haci pregunta na un panel di experto cu lo enfatisa con grandi e balor di e voto Cristian ta den e proceso electoral. Carchinan ta obtenibel na Pastornan di Iglesianan Cristian di Aruba, tambe na Friends of God Bookstore, Citgo Essoville, Citgo Boulevard, Plaza Bookstore y Antesala Cafe. Pa motibonan organisatorio a hala e fecha pa 8 di september. Esnan cu ya tin carchi cu un fecha anterior por usa e carchi aki sin problema.
