No ta 1 ni 2, sino ta un total di 8 acusacion Fiscal di Ministerio Publico a presenta contra ex-Minister Otmar Oduber, awendia Director di su compania di acesoria, JDDS CONSULTING V.B.A, estableci na januari ultimo. E acusacionnan ta encera corupcion, tumamento di placa bou mesa, falsificacion di documento, mal uzo di poder como Minister, fraude y mas. Otmar Oduber a pasa di ta Minister pa ta sospechoso awor di husticia, den un investigacion cu a haya e nomber di “Flamingo”, conduci pa Landsrecherche y Recherche Samenwerkinsteam (RST).
Tabata diaranson ultimo cu Polisnan di Landsrecherche a sorprende Otmar Oduber mas o menos 6:00am na e cas unda e ta bibando temporalmente na Gold Coast. Ey a confisca cahanan cu documento, laptop, computer y tur otro material cu por uza como evidencia den e investigacion. E recherchenan a confisca e celular tambe di e coordinador principal di Minister Andin Bikker y Ministerio di Husticia. No solamente eynan, pasobra a bay tambe na su oficina riba L.G. Smith Boulevard y a bay na su cas mes situa na Pavia 123. Ey husticia a hasta confisca dos container para dilanti su cas, pa verifica si por topa cu evidencia scondi eyden tambe.
“Mi no a mira nada den e file cu ta comprometedor of por condena Otmar Oduber”, asina mr. Chris Lejuez, kende ta acesora Oduber den su defensa, a bisa awe na nos. El a bringa 8 caso den pasado pa Otmar Oduber y orguyosamente el a gana tur! Entre otro e caso den cual a acusa Otmar Oduber di tabata meti den fraude na Fondo Desaroyo Nobo San Nicolas. E sentencia tabata asina na fabor di e politico cu Gobierno mester a pag’e daño y perhuicio despues!
“Mi no tin motibo di pensa cu e biaha aki lo ta diferente”, asina su abogado a subraya na nos. Ta awor numa e caso penal lo cuminsa y ta considera ainda cu e ta den e fase inicial. No sa ainda di kico specifico ta acusa Otmar Oduber, pues ta papia di otorgamento di terenonan comercial di Gobierno pero na ningun caminda den e documentonan ainda no ta mencionando cua tereno specifico, ni kende lo a haya e tereno ey, cuanto lo a paga pe y na kende(nan) lo a paga pa por yega na e terenonan ey na un forma mas facil.
Manera a sosode den otro casonan den pasado, nombernan lo mester bin dilanti di esunnan envolvi, sea ta personanan natural of companianan cu a haci nan mes culpabel na pasa via un tipo di “fast track” pa yega na nan terenonan comercial. Hopi biaha ta lubida cu pa tin corupcion, ta rekeri dos persona. Esun cu ta ofrece y esun cu ta acepta! Asina tabatin comerciantenan cu a haya multa di como 5 mil florin pa a participa den e tipo di actonan coruptivo aki.
Kende mas ta envolvi den e caso tampoco e abogado sa. “Mi sa mes hopi cu Boso y ta riba Boso portal di noticia mi a mira cu nan a bay na Fast Delivery entre otro. Pero den e documentonan cu ami tin, mi no ta mira ningun otro sospechoso”, asina abogado Chris Lejuez a aclaria.
E hecho cu Otmar Oduber awor ta un sospechoso oficial di husticia no ta abnormal cu otro casonan. E abogado a splica cu pa Hues Comisario por duna aprobacion pa drenta Bo cas of oficina pa haci un “huiszoeking”, Bo mester tin e titulo di sospechoso. Pasobra si Bo no ta sospechoso, no tin motibo pa haci uzo di tal posibilidad den nos codigo di procedimiento penal pa drenta Bo propiedad.
E procedura awor lo mester cana su caminda. Di experiencia ta conoci cu e tipo di casonan asina por dura largo, tin biaha mas cu un aña mes. E unico fastioso cu durante e proceso di tin e status di “sospechoso” e lo obstaculisa funcionamento di e sospechosonan den nan cargonan oficial. Entre otro Minister Presidente a anuncia caba cu Otmar Oduber lo mester retira for di e Hunta di Supervision di Refineria di Aruba (RdA) tanten cu ta investigand’e pa corupcion. Minister Andin Bikker mes ainda no a anuncia si e lo sigui haci uzo di e consehonan di Otmar Oduber of si e tambe lo aplica e mesun reglanan di integridad, manera Wever-Croes a anuncia inmediatamente despues cu a drenta casnan y oficina di Otmar Oduber pa investigacion.
