Durante un conferencia di prensa en vivo Prome Minister di Hulanda Mark Rutte a informa di decisionnan tuma den e Conseho di Minister extraordinario relacion cu e malesa di Coronavirus su presencia na Hulanda.
Recientemente a tuma algun decision specifico pa e area di Brabant cu Gobierno a haya necesario pa amplia pa resto di pais ainda, segun e Minister di Cuido Bruins a bisa den e conferencia hunto cu Premier Rutte y Jaap van Dissel, director di Centrum Infectieziektebestrijding di RIVM.
Esaki ta nifica cu personanan cu kehonan di griep of otro kehonan leve di salud, mester keda cas y miho evita contacto social te ora cu ta completamente bon. Tur evento cu mas di 100 hende, na Hulanda, ta cancela. Tur e medidanan aki ta valido te cu prome di april.
Scolnan ta keda habri
Premier Rutte no ta mira motibo ainda pa cera e scolnan. Bou di e hobennante ainda tin poco caso di infeccion. E cierre di scolnan lo causa hopi problema. “Si e studiantenan keda cas, e mayornan tambe mester keda cas. Y tin ta traha den sector di cuido unda cu mester di tur trahado na pia di trabou.”
E mandatario a admiti e medidanan ta profundo y a haci un apelacion na docentenan pa mustra comprension pa e decision di Gobierno pa mantene e scolnan habri. “Aunke nos ta compronde boso preocupacion pa siguridad.” Pa loke ta universidadnan y na HBO-nan, Gobierno ta conseha pa organisa mas tanto collegenan online.
Bishita cerca hendenan grandi y otro personanan vulnerabel mester ta limita. Si nan haya e virus, e chens ta mas grandi cu nan por bira hopo malo of fayece.
A tuma e medidanan aki pasobra no tin tempo pa bay busca e fuente di cada contagio na e momentonan aki. Y cada bes tin mas caso di contagio cu ta aparece na henter e pais di cual e fuente no ta mucho cla.
E presion aworaki ta den e area di Noord Brabant y autoridadnan concerni no por investiga for di cada pashent unda nan a wordo contagia y door di ken. “E fase pa presiona e virus na Brabant a pasa. Nos no tin un grip mas riba kico ta pasa aya nan,”