Diabierna mainta e ex-politico Guillfred Besaril mester a bishita hues comisario pa mira si e ta keda deteni. Besaril, cu su ultimo funcion tabata minister plenipotencario, ta deteni pa iregularidadnan cu e lo a comete durante algun tempo. Ta papia aki di mal uzo di fondo di Arubahuis.
E speransa di e sospechoso di por bay cas a bay perdi ora cu hues comisario a inform’e cu a prolonga su detencion cu 16 dia mas. Esaki tabata riba peticion di ministerio publico pa motibo cu tin hopi mas pregunta cu ta keda pendiente.
E caso aki, conoci como Tulipan, ta bou investigacion for di aña pasa. Prome cu Besaril, a aresta e director-adhunto di Arubahuis Glenn Ling, pero el a keda menos tempo deteni cu Besaril. Mientrastanto e ta na cas pendiente si nan mester di dje pa mas interogacion.
Aña pasa Besaril tabata den corte varios biaha mirando cu a dun’e su retiro y el a bay contra esaki. Na october tabatin e decision final unda cu corte a conclui cu e retiro tabata na su luga.
Tocante Caso Tulipan
E caso aki ta relaciona cu e investigacion grandi cu tin andando riba ex-Minister Plenipotenciario Guilfred Besaril pa uzo indebido di fondonan di pais Aruba. Prome detencion a tuma luga dia 16 di januari, 2024, Glenn Ling (Director suplente di Arubahuis).
Caso Tulipan ta dirigi riba iregularidadnan na Arubahuis den e periodo di 2018 pa 2021. Tempo cu Besaril tabata den funcion di minister plenipotenciario di Aruba na Hulanda.
