Despues cu e dump di Parkietenbos a cera, e tirament’i sushi di cas a bira algo di tur dia. Y centro di ciudad no ta scapa di e plaga aki.
Ya ta for di basta tempo caba cu centro di ciudad ta birando un dump, unda cu ken cu ta por yega ki ora cu ta y tira nan sushi di cas y bent’e eynan. Specificamente Schoolstraat, unda antes tabata un residencia di famia Arends, despues cu tempo oficina di Consul di Alemania, un restaurant local y un ruina bandona den e ultimo añanan. Ta trata aki di e edificio conoci como Cas Veneranda.
E adictonan ambulante tin e centro di ciudad den nan gara y specificamente Schoolstraat ta nan luga preferi pa haci y deshaci cu tur sorto di desperdicio. Un edificio, un tempo un hoya den nos centro di ciudad, awo ta yena cu tur sorto di insecto y otro animalnan.
Den tur e sushinan por mira cu tin te hasta fan bieu, paña tubo y asina por sigui menciona.
Loke ta hala hopi atencion ta cu tur dia turista perdi ta pasa aki y ta critica y ta bisa “what a mess” debi cu esaki ta manda hasta holo malo. Den e proceso aki, hasta cacalaca a sali core cerca di Minister di Naturalesa.
Pero tur esaki a yega na su final diahuebs atardi, caminda cu City Inspector a yega n’e sitio pa asina ‘ruim op de boel.’ Presente tabata t’ey tambe Minister Ursell Arends cu a bin pa inspecciona e trabounan cu tabata tumando luga eynan, den cura di Cas Veneranda.
A lanta cu tur e sushinan y a bay cu nan. Ta spera cu esaki keda limpi tambe y cu e adictonan ambulante no haya un luga limpi pa haci nan fechorianan y tira nan desperdicio den cura di e edificio.
Sigur un bon trabou di City Inspector y Minister di Naturalesa, Ursell Arends.
