Hues a rabia: Gobierno ta keda tene Digicel na liña

3019

Hues pa casonan LAR no a keda contento cu Departamento di Telecomunicacion no a specifica debidamente e condicionnan cu Digicel mester cumpli cu nan pa haya e dos concesion cu nan a pidi. Esaki ta motibo cu a pospone tratamento di e casonan te cu 26 di october awo.

Dello Gomez, a representa e compania The New Millenium (Digicel) den Corte hunto cu abogadonan mr. Ormel y mr. Coffie. For di inicio di e procedura pa haya nan permiso pa cuminsa operacion na Aruba, 21 aña pasa, nan a drenta y sali di Corte y aworaki un biaha mas a dicidi di bay Corte di LAR pa falta di decision riba dos peticion cu nan a haci na DTZ.

Ta trata di peticion pa instala fiber pa yega na e casnan y e di dos concesion ta pa trece kabel submarino pa Aruba cu lo brinda mas capacidad, no solamente pa Digicel pero pa Aruba completo. E peticionnan aki ta haci for di 2016 y te dia di awe no a logra. A rechasa e peticionnan basa riba e mesun condicionnan.  

Durante tratamento di e caso, cu a dura mas cu un ora y mey, a yega solamente na e prome peticion di Digicel, ya cu a dicidi cu ta trata e casonan separa. Hues dado momento a cuminsa haci pregunta unda cu e director di DTZ no por a duna un bon splicacion, por lo menos un splicacion cu a convence Hues riba loke pa e condicionnan cu tin pa cada tipo di peticion. A puntra diferente biaha si e 10 condicionnan cu tin den un carta, si tur dies ta valido pa ambos peticion.

Despues di hopi draaimento sin duna un contesta specifico, Hues a dicidi cu e ta para tratamento di e caso. Esaki a bini despues cu den Corte e director a bisa cu Digicel a manda documentonan pa un di e condicionnan, sinembargo e no tabata completo, ya cu e mester incorpora un mapa detaya. “Awo bo ta bin bisa esey despues cu e peticionnan ta entrega for di 2016,” tanto abogado como Dello Gomez a contesta simultaneamente. Aki ta caminda cu Hues a puntra pakico ta te awo ta bini cu e splicacion aki, pakico no a haci’e despues cu a ricibi e prome documentonan.

Hues a rabia: Gobierno ta keda tene Digicel na liña

Hues a rabia: Gobierno ta keda tene Digicel na liñaClick link pa mas: https://24ora.news/35xLlFP

Posted by 24ora on Monday, September 14, 2020

El a duna DTZ seis siman di tempo pa produci dos lista apart, uno pa cada peticion haci, di e condicionnan cu mester cumpli cu nan. E tratamento lo sigui dia 26 di october.

Dello Gomez

Gomez pafo a splica cu ta trata di dos peticion completamente diferente y no por nenga nan basa riba e mesun motibonan. Hues a bisa, el a splica, cu ta nenga e concesion pa fiber pa casnan basa riba condicionnan cu ta relevante solamente pa e di dos concesion, cu ta relaciona cu kabelnan submarino.

E plannan di Digicel di 2016 ta un plan cu ta trece inversion den structura digital cu lo trece un avance pa Aruba. E proyectonan lo duna trabou den construccion y mehora e infrastructura na Aruba. E tin e impresion cu e Ministernan actual no kier ta esnan cu ta firma e concesionnan aki y ta prefera pa Corte duna e ordo aki, manera cu a sosode den pasado. “E ta algo cu ta politiek gevoelig”, Gomez a bisa.

Banda di e ariba menciona, e concesionnan ta crea cupo di trabou, ta trece mas placa pa caha di Gobierno, y e ta un back-up di internet. E ta sigura un operacion continuo di internet y economia no ta stanca.