Desde diahuebs ultimo caba, Hues a bay di acuerdo cu peticion di abogado mr. David Kock pa duna ordo na Deurwaarder pa pone beslag riba e cuenta di banco di Utilities Aruba NV na Caribbean Mercantile Bank. Cu e decision aki, e compania no por haci ningun pago mas, cu no ta e debe cu e tin cu su ex-Director, cu e ta nengando di paga awo. No obstante cu dia 11 di februari ultimo Hues a dicta na fabor di drs. Frank Hoevertsz y a ordena Utilities pa pag’e su salario y beneficionan pendiente, toch e compania den forma delibera, ta scoge pa no cumpli cu e sentencia di Hues.
No ta prome biaha cu Hoevertsz mester a tuma e caminda di Corte pa forsa Utilities Aruba NV pa cumpli cu un sentencia. Den e prome caso a bay mesun cos, mester a manda carta di abogado cu menasa di bay Corte pa por a logra haya parti di su salario paga, di acuerdo cu sentencia di Hues. Awor cu den e caso den “Bodem Procedure” el a gana na tur demanda y Hues a bay di acuerdo cune pa pag’e loke ta coresponde, awor Utilities Aruba NV a opta pa deliberadamente no cumpli cu e sentencia.
E ora pa evita tardamento y mandamento di carta atrobe, a opta pa bay Corte mesora pa haya un copia di e sentencia y a entreg’e (beteken) na Utilities Aruba NV diabierna di carnaval cu peticion pa den dos dia nan cumpli cu e pago, manera e sentencia ta indica. Esey a pasa diaranson, como cu dialuna tabata un dia liber. Diahuebs ultimo den oranan di mainta, Hues a firma e peticion pa pone beslag mesora y a ordena Deurwaarder pa bay CMB y pone e cuenta di e compania doño di WEB Aruba NV y NV Elmar bou candal. Den un caso asina, nan por paga solamente Franklin Hoevertsz y belasting, ningun hende mas. Den otro ocasion, Hues lo por a yama e abogado di Utilities prome pa evalua prome cu tuma un decision asina drastico. Pero como cu Corte ta mira cu den forma delibera, cada biaha atrobe, e compania estatal ta opta pa no cumpli cu su sentencianan, cu a scoge mesora pa paralisa e operacion di e compania dor di cera su cuenta di banco.
Berguensa internacional
Recientemente Utilities Aruba NV a caba di cera un fiansa multimiyonario pa WEB y ELMAR den cual a refinancia nan debenan y a haya fondo adicional pa otro proyectonan pendiente. E fiadonan internacional mester por tin confiansa cu e compania estatal ta bon maneha y ta solido financieramente. Tipo di accionnan asina, den cual Hues ta condena e compania dor di laga pone nan cuenta di banco den beslag ta manda un mensahe robes pa e mundo financiero internacional. Di mes cu e mesun Presidente di e Hunta di Supervision ta e Director interino awo, pues e mes ta controla su mes, locual den leynan di bon gobernacion, no ta un scenario ideal ni normal.
Dos dia caba sin por haci transaccionnan
Cualkier hende lo pensa cu asina cu a pone beslag diahuebs mainta, cu mesora e compania lo a cumpli y paga su debe cu e Director, cu awor ta obvio cu a kit’e politicamente y sin ningun base legal. Cu e realidad ey den mente Hues a condena Utilities Aruba NV bou maneho di Ir. Richard Eman, pa cumpli cu tur e derechonan stipula den e contract di trabou di e Director. Aunke a pensa cu e compania lo regla e asunto mesora pa evita un berguensa nacional y internacional, toch nan a scoge pa no haci esey. Henter diahuebs a pasa y henter diabierna tambe a bay sin cu CMB a logra transferi e suma riba e cuenta di banco di e victima di persecucion politico.
Dialuna ta habri cu cuentanan cera
Comokiera cu diabierna no a logra transferi e suma indica pa Hues na Drs. Frank Hoevertsz, e cuenta a keda den beslag. Ta casi increibel pa pensa cu e compania estatal mas grandi di un pais, ta keda cu su cuenta di banco cera for di diahuebs te dialuna, pues 5 dia largo sin por haci ningun pago ni haci transferencianan corespondiente. Cu e cuenta di CMB den beslag, no ta conoci awo ki otro paso abogado mr. David Kock lo tuma pa aumenta e presion mas ainda riba e compania estatal, of cerca su Hunta di Supervision, su Director y Gobierno cu ta doño di e compania. Mirando cu no ta pagando, kisas un beslag riba e cuentanan di Gobierno di Aruba lo por sigui awor como consecuencia.
