Diasabra atardi a bati alarma na Polis pa un turista Mericano cu a haci un acto inmoral cu un mucha muhe turista di apenas 12 aña di edad. Esaki a sosode na Palm Beach, pa cual e famia, procedente di Chile, a yama Polis mesora pa e homber perverso. A detene mesora y a hib’e Warda di Polis na Strandpolitie pa interogacion y despues a keda di pas’e pa Jeugd en Zeden Politie pa mas investigacion.
Famia di e mucha muhe a conta nos cu esaki ta di dos biaha cu nan ta bin Aruba pa pasa vakantie. Nan gusta nos isla masha y te precisamente e yiu muhe di 12 aña aki ta esun cu ta pusha e famia pa bin Aruba pa nan por bay lama y pasa bon. Henter dia nan ta pasa na lama, gosando di nos solo y beachnan blanco.
Di acuerdo cu e omo, awe no tabata un excepcion. Su sobrina a bula den awa y e homber aki a sali bula su tras. E mucha muhe a pensa sigur cu lo ta su tata tabata su tras y no a spanta ora a sinti un hende bras’e di patras. Pero e no a keda solamente na un brasa. E homber pedofiel a hinca su man den e badpak di e mucha muhe y a mishi cune na su parti delicado, pa cual e mucha a dal un grito y a bay den panico mesora.
Ta na e momento ey e famia tambe a activa y a sali riba e homber cu tabata nenga di sali for di awa. Asina mes a logra uza forsa riba dje pa sak’e afo y warda riba yegada di Polis cu a hib’e Warda di Polis no solamente pa investigacion, sino tambe pa su propio siguridad. A sinti cu si el a keda un rato mas, cu e famianan na e sitio lo a saca tur nan rabia riba dje.
E caso awor ta bou di investigacion di recherchenan specialisa den atende casonan cu mucha. A keda di hiba e mucha Hospital pa haci un check-up toch. Tambe rechechenan lo mester papia cune pa por saca afo exactamente con e acto a sosode y asina pa confronta e homber cu locual el a haci. E investigacion lo por ocasiona cu e homber lo mester keda Aruba algun dia mas pa responde pa su acto.
