“Mi no a bay Corte pa pidi placa. Esey ta mi derecho. Mi a bay pa conserva mi integridad, mi bon nomber, mi carera y mi experiencia. Esey ta di mi, di ningun Minister of ningun Gobierno. Esey ta mi estudio, mi caracter y mi forma di ta. E sentencia ta reconfirma esey. Mi ta hopi contento!”, asina drs. Franklin “Frank” Hoevertsz a bisa pafo di sala di Corte, para banda di su señora Yamila. E sonrisa riba su cara tabata suficiente pa sa cu el a gana su caso paden.
Abogado mr. David Kock a defende Frank Hoevertsz den e proceso aki, cu mas bien tabata e “bodemprocedure” den e caso sumario cu el a gana caba na april aña pasa. Ey Hues a dicidi cu Utilities Aruba NV mester pag’e y cu e tin derecho riba e pakete di retiro cu tin acorda den su contract. Sinembargo, Utilities Aruba NV a nenga y a causa cu mester a sigui e bataya legal. Abogado mr Anthony Ruiz a representa Utilities Aruba NV y Gobierno di Aruba como doño di e compania.
Sin kier bay mucho den detaye di e caso, den corto Hues a scucha ambos partido. Utilities ta bisa cu e no kier paga Frank Hoevertsz pa su retiro pasobra ta considera su nombracion como politico. Cu e no a sirbi den su funcion y di a sigui ordo di Gobierno. Como tal a pidi Corte pa declara su contract di trabou como nulo y consecuentemente no lo mester paga ningun sorto di recompensa di retiro tampoco.
Frank Hoevertsz di su banda a sigura cu su retiro ta politico. E tin e estudio, e experiencia y e carera pa demostra su capacidad pa maneha e compania. Pero el a splica e Magistrado e custumber politico na Aruba, pasobra personalmente, esaki ta di tres biaha cu un Gobierno di asignatura di MEP ta kit’e di trabou, pues casi el a custuma caba.
Loading…
Reload document 
Open in new tab Hues a bisa cu e no ta bay “toets” si tin politica den e disputa of no. Su rol ta pa determina si e contract ta valido of no. Su decision ta cu SI e contract ta cuadra y cu Gobierno no a logra convence cu prueba cu Frank Hoevertsz no ta capas pa maneha e compania of cu e no tabatin e preparacion pa haci tal. El a ordena pa cumpli cu e contract di trabou den cual ta menciona e suma cu mester pag’e. Claro tin espacio pa interpretacion pa cual e Hues mes a interpreta e suma final cu tabata un krenchi menos di locual Hoevertsz a demanda.
