Dialuna atardi Sweet Pan Music Productions a presenta un rueda di Prensa na Charlie’s Bar den mainstreet na San Nicolas. E team di Sweet Pan Music a duna informacion riba e evento cu ta na caminda, ’Honor to Connor Steelband Extravaganza edicion number 2.
Nico Connor hunto cu rumannan Lee Connor y Eugene Jones, Paula Engelen PR di Sweet Pan Music, e hoben musico Marver Guedez, Stanley Dabian di Departmento di Cultura, y Sr. Charles Brouns di Charlie’s Bar, a hiba palabra splicando mas di e evento y invitando e pueblo di Aruba pa assisti na e evento musical aki unda lo duna honor na e Pionero numero uno den musica Steel Pan Sr. Edgar Connor (d.f.m.) riba su fecha natal y tambe celebrando Carnaval su di 66 aniversario den cual durante comienso di Carnaval di Aruba Sr. Edgar Connor a aporta enorme cu su musica di steelpan.
Charles Brouns y Stanley Dabian ya caba ta premira cu e evento aki por bira un hopi grandi mes, cu presentacion di steelbands di exterior, nan ta kere firmemente den e proyectonan di Sweet Pan Music y ta duna sosten na esaki pa asina hunto por traha pa sigi mantene y engrandese musica di steelpan aki na Aruba.
Sweet Pan Music ta keda crea diferente plataforma pa sigi encurasha otro steelbands, steelpan artists y crea e interes entre hobennan pa e instrumento di steelpan. Y pa asina sigi aporta na herencia musical di steelpan y na cultura di Aruba. Diasabra awor 18 di Januari 2020 lo tin diferente steelbands y artistanan cu lo bai presenta, entre otro The Boys Pan Experience, hobennan musico Marver Guedez y Karlson Peterson, studiantenan di Aruba Panman Foundation, The Aruba Invaders, Cocorico in Motion Carnival Dancers, y mas. Lo cera mainstreet dilanti Charlie’s Bar (B v/d Veen Zeppenfeld Straat) unda lo tin stands di bebida y cuminda. Un invitacion ta bai pa henter Aruba pa bin disfruta y duna sosten na nos musica di steelpan durante e ‘Honor to Connor Steelband Extravaganza ediccion number 2 cu ta cuminsa pa 6or di atardi y lo termina pa 10 di anochi. Entrada ta completamente gratis!
