Awe un total di 7 alumno di e Facultad di Hospitalidad y Maneho den Turismo a ricibi un reconocimento special den e “Dean’s List” di Universidad di Aruba. Pa por subi e lista aki, e alumnonan mester demostra un prestacion superior na otronan den e trimester cu a caba di pasa, mara na average di puntonan halto. E decano di e facultad aki, esta Meneer John Wardlaw a entrega e certificado di reconocimentonan aki awe durante un desayuno specialmente prepara pa e studiantenan aki. Jim Hepple, Profesor den e facultad aki tambe tabata presente pa encurasha e studiantenan pa sigui haci nan best!
E alumnonan cu miho a studia den e ultimo trimester den e facultad di turismo tabata:
- Mary Joan Wardlaw
- Danyela Vasquez
- Sophie-Diane Donker
- Stephanie Matos
- Maria Talavera
- Karel Arends
- Annabel van Westerop
Desde aña 2005 a institui e programa di “Bachelor of Science program in Hospitality and Tourism Management Studies” na Universidad di Aruba, ofreciendo oportunidad na studiantenan y profesionalnan pa logra desaroya nan mes tanto na nivel personal como academico.
E curso di 3 aña aki ta cera e studiantenan conoci cu varios aspecto di negoshi, di hospitalidad y turismo, incluyendo “Organization & Management, Sales & Marketing, Human Resources & Training, Operations & Technology, Economics, and Finance & Accounting”. E studiantenan ta haya oportunidad pa explora e mundo internacional di turismo y siña tocante e rol y importancia di sostenibilidad den cultura, naturalesa y medio ambiente.
