E homber riba e foto a perde su libertad diamars mainta. E tabata bende cierto weganan style di Play Station via rednan social. E tabata mustra un modelo cu su caha. Dos hende sigur a tuma e oferta y cumpra e wega cu e tabata bende. El a entrega e caha cu el a show pero e contenido mes no ta loke e caha mester tin.
E modelo den e caha ta uno mas anticua y di menos prijs. Kisas el a bende mas pero te awo ta dos denuncia tin. Den terminologia investigativo di polis ta yama esaki oplichting. El a estafa hende. P’esey mes despues di dos denuncia haci, a mustra Ministerio Publico riba e denuncia y fiscal a duna ordo pa detencion.
Diamars mainta recherche a presenta hunto cu K-9 Unit na South Beach unda e homber ta traha. Eynan a mustr’e riba su derechonan y detene mesora. E no a resisti. Coleganan a splica cu ta un trahado hopi trankil.
Nan no a pensa cu e por ta envolvi den algo robes. Ademas loke el a haci no tin di haber cu su trabou tampoco. Solamente e mester duna cuenta pa dos denuncia haci pasobra e hendenan cu a cumpra cos cerca dje ta sinti nan mes estafa.
