Holmo Henriquez, lider di partido MAS a presenta na Centro di Bario Noord pa e por deposita su voto. El a presenta cu su bus, kibrando barera. Awe ta un dia hopi importante. Importante pa pueblo su futuro pasobra e ta determinante. Nos tin problemanan structural, operacional, di maneho di Gobierno cu ya pa decadanan ta bayendo fout. Pesey ta responsabilidad di nos tur pa nos deposita nos voto pa un cambio sincero y berdadero. Bishitando e pueblo aki pa basta tempo caba, bo ta scucha e peticion pa esey. Si nos kier un cambio sincero, nos no por bay bek na esunnan cu a forma parti di e problema. Esunnan cu a forma parti di e problema nunca por ta parti di e solucion. Pesey MAS ta existi, pasobra nan ta sinti y convivi e mesun dolornan cu e pueblo a convivi pa añanan caba.
Coregi
Nos tin cu pone nos trias politica traha. Mester independisa institutonan y for di e influencia politico, pa asina por hiba un miho maneho di Gobierno tambe y sirbi e derecho di nos pueblo. E pueblo ta wordo intimda. Bo derechonan no ta wordo sirbi, pasobra Gobierno ta pasa riba tur procedura legal cu ta existi. Asina aki bo no ta sirbiendo e miho interes di pueblo.
Tabata tin e forum di IPA caminda cu nan mes a expresa cu 3 eleccion pasa, ainda nan ta discutiendo e mesun prolemanan awe. Den tur e temponan aki, signatura pa signatura, nada por a cambia. Pero si nan por a traha riba un ley di cacho, pero no por a traha riba ley cu ta proteha nos yiunan for di abuso, nos ciudadanonan for di abuso. Nan no por a percura pa un HBO wet, nan no por a percura pa un ARBO wet. Un ex minister di Labor cu tin su mesun partido nobo, nan ta bin cu partido nobo pa drecha nos situacion den sector laboral. Pero tempo e tabata den Gobierno como minister e mes no a haci nada. Tempo e tabata na poder, e no a haci esey.
Balanse
Henriquez ta kere den un balanse den Gobierno. Con cu bay pone, sea ta un Gobierno so of un coalicion, mester tin separacion di poder pa por sirbi nos pueblo. Si no tin separacion di poder, bo no por sirbi e interes di e pueblo. Pesey bo ta haya e trapamento riba nos derechonan.
Asiento
Realisticamente ningun hende no por bisa nada. E eleccion aki lo trece hopi sorpresa pasobra e hendenan ta hopi cansa. MAS a traha pa e maximo di asiento cu pueblo por deposita den e partido.
Si MAS ta habri pa traha cu e partidonan grandi, ta semper bay tin e interes di e pueblo na prome luga, nada otro.
Mensahe den comunidad
E exposurenan tabata limita, pero si nan tabata efectivo den trece e mensahe pa e pueblo, nan intencionnan y a bin cu candidatonan cu curason pa sirbi e interes di pueblo.
