Un famia na Savaneta a pasa den un susto grandi diamars anochi ora cu a yega na nan cas di cunucu y constata un vandalismo grandi cometi eynan.
Pero no a dura mucho cu a haya informacion di kende a comete esaki y ni 24 ora despues, detencion a cay.
E cas di campo of cunucu ta pertenece pa añas caba na herederonan Henriquez y e ta situa den un area un poco aleha patras di e tanki di WEB. Y e agresor ta un hoben cu un miembro di famia a cuida mescos cu un yiu y esaki ta algo cu nunca a spera di lo bay sosode.
Diamars anochi ora cu Miriam van der Linden a yega na e cas di cunucu el a spanta su alma. E mucha homber en cuestion a destrui porta, a pinta graffiti y a laga menasa atras. Pero tambe a cende candela. E mucha homber di fam C. a wordo cria door di e omo di Miriam, hunto cu su casa.
Poco dia atras caba tabatin un problema y e casa di Miriam a bay cerca esun cu a cria e mucha homber aki pa inform’e loke cu a pasa. E hoben cu tabata eynan, hunto cu algun amigo, a cuminsa ataca casa di Miriam cu piedra y cuchiu. Por poco nan a baha un bloki riba dje, pero e omo (tata di crianza) a yega net na tempo.
Esaki ta tres biaha cu denuncia aki ta wordo haci contra e y hoben. “Nos no por sigui asina mas, e situacion aki a bay demasiado leu,” e señora a comenta.
E hoben ta kere cu e propiedad ta di dje y drenta y sali ki ora cu e kier. Nan a prohibie pa drenta e propiedad pa motibo cu e ta bini bestianan horta y sconde nan riba e tereno. Y esaki, segun Miriam, ta tur e rabia cu e tin.
Despues cu a bolbe haci denuncia contra dje diaranson, mainta, mas o menos un ora despues Polisnan a detene.
