Èni: Caricatura nobo na Papiamento ta un realidad

Loke a cuminsa como un deseo, a bira realidad. Layssa Vos-Pimentel y Dave Vos, un pareha jong cu dos yiu, un di 5 y e otro di 1 aña, a demostra cu si bo ta kere den bo metanan, esaki por wordo cumpli cu disciplina y determinacion.

Na momento cu e pareha a bin cu e idea pa crea un caricatura na Papiamento pa mucha di entre 0-5 aña, pa e islanan Aruba, Corsou y Boneiro, esaki a wordo desaroya y recientemente a bira un realidad.

‘Èni’ ta un caricatura cu ta duna nos muchanan e oportunidad pa descubri y siña palabra, obheto y hopi mas na un manera interactivo den nos mes idioma Papiamento. Loke ta haci Èni aun mas interesante ta e colaboracion cu esaki a trese entre diferente celebridadnan di nos islanan ABC, manera entre otro Jandino Asporaat, Jeon y Irsais. 

Den luna di maart 2019 Layssa y Dave a bin na e idea pa crea un caricatura na Papiamento. Actualmente nos muchanan ta lanta den un mundo cu tecnologia hopi avansa, cu ta haci’e mas accesibel pa nan scoge loke nan kier wak y tambe den cua idioma, pero faltando nos idioma Papiamento como un opcion pa nan scoge. Cu e presencia di Èni, a bin finalmente un cambio den esaki. 

Den luna di mei, e pareha a elabora e historia cu Èni lo trece cune, como consecuencia cu mester a busca personanan pa anima e caricaturanan. 

Èni ta un mucha muhe di 2 aña cu a nace na Corsou. Su curiosidad ta e motor pa siña hunto cu nos muchanan tocante entre otro diferente palabranan y obhetonan.  Esaki semper ta sosode den compania di su amigonan.

E personahe Èni ta wordo interpreta pa Qu-Lainey Jansen, E grabacion di voz muchanan di Èni ta wordo interpreta pa Jayzley Brown, Iszaïr Rodriguez, Jayrich Koolman y Qu-Lainey Jansen.

Pa loke ta trata e otro personahenan, Layssa a acerca entre otro Jeon, Jandino Asporaat y irsais. Tur e tres talentonan menciona, apesar di nan agenda druk, a kere den e proyecto y mesora a haci nan contribucion pa por haci esaki posibel. 

Jeon ta e productor musical di Èni y tambe ta representa e personahe Fladi, un flamingo homber cu gusta canta y baila.  

Pa loke ta trata Jandino, e ta duna bida na e personahe Dino, un lora pirata cu ta conta su experiencianan riba lama, den forma di un cuenta. E talento Boneriano Irsais ta enfoca riba Kabi,  un cabrito cu lo educa den algun concepto di matematica. 

Ta importante menciona cu tin e opcion pa disfruta di Èni den diferente version di Papiamento, asina nos muchanan di islanan Aruba, Boneiro y Corsou por sinti nan mes identifica cu nan idioma. 

E meta di Layssa y Dave ta pa duna nos muchanan e oportunidad pa por disfruta di un caricatura educativo na nos idioma materno, crea union den nos islanan y promove Papiamento internacionalmente. Tambe a pareha ta hopi agradecido pa e yudansa financiero cu nan a ricibi di Stichting Prins Bernhard Cultuurfonds Caribisch Gebied, na comienso di e proyecto pa por yuda cu e lansamento di esaki.

Actualmente Èni ta un realidad y por sa mas di Èni cu su amigonan via https://www.eni-online.tv/aw of por contact 7466201. 

Ban descubri y siña hunto cu Èni

Skirbi pa Desi Dijkhuizen di Dcommunicates

Informacion adicional tocante Èni:

Productor: Dave Vos

Director: Layssa Pimentel-Vos

Hefe di mercadeo: Rozanne Thiel

Grabacion di voz Corsou: Vanessa Vos

Grabacion di voz Aruba: Shanna Rodriguez

Grabacion di voz Boneiro: Nurca ‘Noebby’ Araujo Nuñez

Productor musical: Jeon

Cantante: Eva Rhuggenaath

Diseñador di Movecion: Caio Ferreira

Diseñador di Personahe: Adelmo Morales

Personahenan:

Èni: Qu-Lainey Jansen

Dino: Jandino Asporaat

Fladi: Jeon

Kabi: Irsais

Yena: Kanisha Sluis

Isha: Akisha Albert

Kiki: Kiana Cova

Rozi: Rozanne Thiel

Rigi: Ro-endry Bryson