Cumpramento di bus nobo ainda no ta dunando resultado

Keto bay 24ora.com ta haya yamada di empleadonan preocupa di Arubus. Nan ta kehando keto bay cu e servicio cu nan kier brinda na e comunidad di Aruba, nan no por haci’e manera mester ta.

Nan ta preocupa pasobra busnan na e momentonan aki cu mester ta den condicion pa move riba caya no ta den e forma apto pa asina nan por brinda e servicio na e usuarionan.

No ta desconoci cu recientemente a busca un flota di 15 bus nobo. Busnan cu a yega, pero lunanan largo no por a brinda e servicio na e comunidad di Aruba.

Cumpramento di bus nobo ainda no ta dunando resultado

Cumpramento di bus nobo ainda no ta dunando resultado. Click e link pa mas https://24ora.tv/2u2mXeN

Posted by 24ora on Wednesday, January 15, 2020

E busnan aki a bin for di Brasil. Despues cu gobierno a paga e busnan, e minister a bay nuebe dia Brasil cu un delegacion, p’asina bay mira e busnan cu nan a cumpra.

Un biahe innecesario, gastando placa cu no tin na Arubus. Mientras tanto busnan a yega Aruba y awe por bisa cu mita di e flota so ta riba caya. Mientras cu empleadonan di Arubus ta cremencha riba caya cu e busnan bieu ainda, solamente ocho di e busnan nobo gekonkel, a wordo adapta, p’asina por a subi caya y brinda servicio.

Adapta of gekonkel pasobra na momento cu e busnan aki a yega Aruba, a resulta cu nan airco no ta fria suficiente pa brinda e servicio na e comunidad di Aruba den un pais cu un solo cayente.

A adapta e poulenan, a los y cambia fanbelt, adapta of konkel, p’asina finalmente algun di e busnan aki subi caya y duna servicio na comunidad.

Pero awo ta resulta cu constantemente sea fanbelt ta bula of zonidonan straño ta bin via e busnan aki, unda hasta empleadonan mester para e bus canto di caminda p’asina mecaniconan bin drecha esaki mesora.

Mientras cu a logra konkel y adapta ocho bus nobo pa subi caya y baha e presion di e busnan bieu cu tambe tin problema, keto bay miyones hinca den bus, tin shete bus nobo nobo para bao di garashi, cu no por sali pa brinda e servicio, debi cu e airconan no ta sirbi pa e clima di nos isla.

Busnan cu number paga, seguro paga, no por sali riba caya. Diescinco bus cumpra, miyones inverti y awe ocho so ta riba caya despues di varios luna cu nan a yega Aruba.

Probablemente lo bay haci un aña cu e busnan aki a yega Aruba y ainda hopi di nan nobo nobo ta para den cura di Arubus, sin por duna e servicio, pasobra ainda nan mester wordo gekonkel of adapta pa asina nan por subi caya y e airco por fria pa duna e servicio na e comunidad di Aruba.

No por core cu bentana habri pasobra bentana di e busnan aki ta masha chikito mes y ariba cu ni esey nan a pensa cu den futuro, si no tin airco, por sigui duna servicio manera otro busnan bieu cu tin, cual ta habri e bentana pa asina e bus core sin airco.

Placa di pueblo benta afo. Minister hunto cu e director a bay keiro te Brasil pa bay wak bus. Kiermen ta un malgastamento di placa so tabata tin den henter e proceso di compra di bus, pasobra no a mira cu e busnan aki no ta adecuado.

Awe henter Parlamento/Coalicion ta den un silencio total riba e mal uzo di placa di pueblo, mal inversion haci cu fondonan di pueblo, unda cu 15 bus a wordo cumpra. Ocho a wordo gekonkel of adapta pa subi caya y shete keto bay benta den cura di Arubus.

Y e nobonan cu a adapta y konkel, ta saca zonido straño of fanbelt ta bula riba caminda y atrobe tin cu yama mecanico mesora pa bin drech’e prome cu nan sigui core cun’e y pasaheronan mester wordo pasa den un otro bus pa asina nan por yega nan destino.