Tin hopi dolor den nos pueblo specialmente den e hogarnan caminda cu hoben (mucha homber y mucha muher ) no ta tende di nan mayor y ta scoge un caminda robes. Ta afilia nan mes na cierto grupo of amistad cual no ta beneficioso pa nan den ningun sentido caminda nan futuro lo ta hopi scur .
Tin tipo di amistad of afiliacion na cierto grupo caminda e hoben tin cu haci algo malo, sea horta, bringa of den tur manera haci algo negativo pa asina demostra su lealtad na e grupo. Bo ta puntra bo mes con por ta posibel den e tempo moderno aki por tin tanto maldad kier domina riba nos hobennan.
Pesey a yega e tempo pa nos tur duna un man di bon conseho di palabra di Dios na nos hubentud. Proverbionan Capitulo 13 vers 20 ta bisa: Esun cu cana cu hende sabi lo ta sabi, ma un compañero di hende bobo lo sufri daño. Hoben wak bo amistadnan bon, no cana cu hende negativo cu ta manda bo haci malo pa bo mustra cu bo ta bon cu nan. Abo lo perde bo integridad y cu hopi chens di conoce prison.
1 Corintionan Capitulo 15 vers 33 ta bisa : No laga ningun hende gaña boso , Mal compania ta daña bon custumber. Husa boso sano huicio manera mester ta , y stop di haci pica , pasobra algun no tin conocemento di Dios.
Maske con bon bo mayornan cria bo, cu respet y moral na halto, ora abo ta cana cu mal amigo, bo ta perde tur e cosnan bon cu bo a ricibi na cas, pasobra bo ta wordo contamina y intoxica cu maldad.
Proverbionan Capitulo 16 vers 28 ta bisa : Un hende perverso ta sembra pleito, y un hacido di redo ta separa amigonan intimo.
Tin hende cu ta cana cu mente malo, cu no ta pensa nada bon pa haci, y no ta respeta un amistad decente, hala leu for di hende asina.
Galationan Capitulo 6 vers 3 ta bisa : Si un hende pensa cu e ta algo, siendo e no ta nada e ta gaña su mes.
No laga ningun hende hunga hefe riba bo y duna bo ordo pa haci maldad, esey no ta di Dios. Dios nunca ta manda hende haci algo malo pa demostra lealtad na Dios.
Proverbionan Capitulo 22 vers 24+25 ta bisa : No cera amistad cu hende cu ta gusta rabia,y no anda cu hende di mal genio, pa bo no siña su camindanan , y pone un trampa pa bo alma.
Hende cu tin mal genio y ta gusta rabia tur momento tin un mal spirito,y tur e cosnan ey por wordo transmiti di un persona pa otro, sin bo ripara bo ta bira mescos of pio cu nan.
Juan capitulo 15 vers 14 ta bisa : Boso ta Mi amigo, si boso haci locual Mi ta ordena boso, esey kiermen cu Hesus ta amigo di tur hoben.
Mayor corda bo yiu cu Hesus ta su amigo pa semper.
