Camara di Comercio tin comprension pa e echo cu e poder di compra di e ciudadano a cay door di inflacion. Sinembargo, presidente mr. Monica Kock a duna di conoce cu un aumento di salario minimo no necesariamente ta e miho solucion ya cu, esaki, riba e otro medidanan cu gobierno tin prepara pa comercio y tambe inflacion ta obliga e doño di negoshi di sea cera of hisa su prijsnan, cual atrobe ta aporta na inflacion.
Adicionalmente, e presidente di KVK a indica diamars mainta den conferencia di prensa, cu pa hisa e salario minimo tin un procedura cu gobierno tin cu sigui. Entre otro, mester basa riba data. Si e argumento ta inflacion, en berdad esey ta cifranan cu t’ey, pero di otro banda no ta na Aruba so, pero na henter mundo.
Mr. Kock: “Di un banda mi por bisa cu mi por compronde di hisa e minimum loon, paso mane nos ta bisa, e poder di compra di hendenan na Aruba ta kitando. Nos ta compronde esey, pero bo mester compronde tambe di otro banda cu, si bo ta hisa e minimum loon, ta otro caminda e doño di trabou tin cu corte. Chens ta grandi cu esey lo ta bay ta cu e ta gewoon hisa e prijs.”
