E homber Henry Dabian a sinta dilanti Hues diabierna merdia, tabata blo bisa no riba tur e preguntanan cu Hues a hacie relaciona cu e acusacion presenta cu riba e acusacion cu a presenta contra dje, di a abusa di su yiu na mas di un ocasion na 2006.
Tabata aña pasa cu e yiu menor di edad finalmente a haci denuncia di loke a pasa cu ne na 2006 ora cu e tabatin 8 aña. Nunca prome el a tribi di haci esaki pa miedo. Fiscal a pidi un castigo basa riba e ley vigente di e tempo (2006) ey, cu ta 36 luna.
Den e proces-verbaal tin informacion cu ta manera contradeci otro cu si tin famia cu tabata na altura di esaki of no. Pero e denunciante mes ta bisa cu prome cu 2021, e no a bisa niun hende nada. Den e rapport tin audio ora cu e mama a bay reclama e acusado kico a pasa na momento cu e denuncia a wordo haci.
Fiscal a bisa e acusado cu e ta haya straño e reaccion pasivo di e acusado mientras cu e mama di su tres yiunan na grito tabata reclam’e kico a pasa. “Mi no gusta pleita,” el a contesta fiscal. “Y”, el a agrega, “mi a keda sorprendi y den shock di loke e ta acusami di a haci.” E ta bisa cu e tin tres yiu y nunca el a mishi cu nan. Tur tres semper tabata hunto cu ne y e no ta kere cu tabatin momento cu e por tabata su so cu e yiu muhe cu a haci denuncia contra dje.
E denunciante den e caso aki a keda keto pa casi un decada. Despues cu el a bolbe di un vacacion na Grecia, e tabatin un combersacion cu su amiga. El a conta e amiga aki kico a pasa cu ne hopi aña pasa. “Bo ta kere cu esaki ta algo normal?” el a puntra su amiga, kende a scuch’e y a puntr’e si e lo kier conta un hende grandi loke a pasa cu ne. Pero e no tabata kier. Finalmente el a conta su ruman homber, kende a rabia masha hopi, pero e caso no a progresa. Finalmente el a haya e curashi y apoyo di su amiga pa bay polis y conta loke a pasa.
