Un di e problemanan cu no por core riesgo di yama ningun reunion importante e dianan aki ta pasobra e fraccion di MEP tin un miembro ausente, pafo di Aruba. Ta trata aki di Alvin Molina y e motibonan no ta conoci.
Durante e conferencia di prensa di MEP dialuna mainta, Hendrik Tevreden a confirma e ausencia di Molina di trabou. “E ta ausente pa motibonan personal. Pronto e lo ta bek y e mes lo splica e motibo pakico e ta ausente. Ora e ta bek nos lo mira continuacion di reunionnan den sala di Parlamento.”
El a mustra riba e sucedido durante e reunion di TPEF, unda cu “weganan infantil ta tuma luga ora tin hende ausente. Oposicion no ta duna quorum, a pesar cu nan ta wordo paga y cu ta parti di nan trabou pa mantene quorum, nan no ta scoge pa haci esaki. Ora cu tin hendenan cu mester biaha pa motibonan personal of salud, ta haci e proceso di por tin reunionnan publico mucho mas slow. AE ta tarda e proceso. Ora cu tur hende t’ey bek, nos tin un coalicion di diesun y tur cos por sigui pa trata leynan cu ta importante pa Aruba.”
Despues di loke a pasa cu e ley di TPEF, den coalicion a dicidi cu na momento cu tin miembro di coalicion ausente, lo no yama reunion pa trata leynan di embergadura grandi. “Bo no ta sinti of mira e madurez di parti di oposicion pa trata e trabou aki di un forma serio. “Asina cu Alvin Molina bolbe, lo bay bek na normalidad.”
Otro reunionnan interno, di comisionnan y OB lo sigui normal pasobra no mester tin 11 parlamentario pa forma quorum. “Pues pa e siman aki lo no tin ningun reunion publico, pasobra pasado a mustra cu no tin seriedad den oposicion,” Tevreden a bisa.
