Gobierno di Aruba a haci masha preparacion pa loke nan a considera un sorpresa pa e pueblo di Aruba. E preparacion tabata cla y nan a yama prensa pa asina join e evento pa yegada di e helicopter pa Polis. A prepara hasta hende di CEA pa cuida e helicopter na Tanki Flip.
E preparacion tabata pa sali cu e helicopter for di Airport y baha na e Helipad cu tin na Kazerne di Bombero na Tanki Flip. Naturalmente e helicopter mester yega Aruba prome cu tur esey sosode. E situacion na Venezuela a pone cu e Helicopter no por a crusa di Colombia pa Aruba. E compania Caribbean Flight Support ta esun cu ta bay handle cu e Helicopter. Mientrastanto e compania Sadisas ta e compania cu lo opera e Helicopter.
Ta companianan di Colombia. Informacion haya for di fuentenan den aeropuerto y yega na gobierno, a splica cu e helicopter a sali for di Bogota pa Rio Hacha. Di eynan mester a yena su tanki pa asina sali straight pa Aruba. E vuelo aki pa e dura menos tin cu pasa den e espacio aereo di Venezuela. Mirando cu fronteranan ta sera ta importante pa haya clearance prome di Venezuela. Esey tabata e dolor di cabes. No a haya e clearance di Venezuela pa e biahe di Rio Hacha pa Aruba.
Pesey mes aunke a prepara tur cos pa helicopter yega Aruba na aeropuerto y despues di clearance sigui pa Tanki Flip, tog henter e preparacion a cancela. E intencion tabata pa dos mandatario subi e helicopter na Airport di Aruba y yega na Helipad na Tanki Flip unda e acto official lo a tuma luga. Awor ta cuestion di keda warda pa mira si Venezuela ta duna ok pa e helicopter por coy e ruta pa Aruba. Asina mes e minister a splica tur loke a sosode y firma acuerdonan pa oficializa e contrato cu e compania pa e Helicopter cu Polis lo haya.
